لاہور :وزیراعلیٰ پنجاب مریم نواز نے صوبے میں کاروباری سرگرمیوں کو جدید تقاضوں سے ہم آہنگ کرنے اور آئی ٹی کے ذریعے معاشی ترقی کے لیے ای کامرس منصوبے کی منظوری دے دی ہے۔
منصوبے کے تحت نجی شعبے کی تجربہ کار کمپنی کے ذریعے آن لائن مارکیٹ پلیس چلائی جائے گی، جس کے ذریعے 2 ہزار سے زائد چھوٹے اور درمیانے درجے کے کاروباروں کو ملکی اور عالمی منڈیوں تک رسائی فراہم کی جائے گی۔
منصوبے کی منظور شدہ لاگت 53 کروڑ 29 لاکھ روپے تھی، جسے بڑھا کر 95 کروڑ 57 لاکھ روپے کرنے کی تجویز پیش کی گئی ہے۔
منصوبے کا مقصد کاروباری اداروں کو ڈیجیٹل پلیٹ فارم سے منسلک کرنا، مصنوعات کی آن لائن فروخت کے مواقع بڑھانا اور پنجاب کے کاروباروں کو بین الاقوامی مارکیٹ میں متعارف کرانا ہے۔
