وزیر اعظم کا پی ٹی وی فیس ختم کرنے کا اعلان

وزیر اعظم محمد شہباز شریف نے بجلی کے بلز میں شامل پی ٹی وی فیس ختم کرنے کا اعلان کر دیا ہے۔
انہوں نے کہا کہ یہ فیصلہ بجلی صارفین کے حقوق کے تحفظ کے لیے کیا گیا ہے۔
یہ اقدام شہریوں کو بااختیار بنانے اور ادارہ جاتی اصلاحات کی جانب ایک اہم سنگ میل ہے۔

انہوں نے "اپنا میٹر، اپنی ریڈنگ” ایپ کے افتتاح کے موقع پر خطاب کرتے ہوئے کہا کہ توانائی کے شعبے میں شفافیت اور سستی بجلی حکومت کی اولین ترجیح ہے۔
انہوں نے کہا کہ بجلی چوری جیسے سنگین مسئلے کا حل ضروری ہے، اور حکومت اس پر تیزی سے کام کر رہی ہے۔

بجلی کے شعبے میں انقلابی اقدامات

وزیر اعظم نے کہا کہ یہ ایپ وزارت توانائی کی ایک سال کی مسلسل محنت کا نتیجہ ہے جس کی قیادت اویس لغاری کر رہے ہیں۔
ڈسکوز کے بورڈز میں بڑی تبدیلیاں کی گئیں، کرپشن کے خلاف اقدامات کیے گئے، اور بجلی کی قیمتوں میں کمی کے لیے مسلسل کوششیں ہو رہی ہیں۔

انہوں نے بتایا کہ آئی پی پیز سے مذاکرات شفاف طریقے سے مکمل ہو رہے ہیں۔
بینکوں کے ساتھ بات چیت کے ذریعے گردشی قرضے پر سود کی شرح کم کرنے میں کامیابی ملی ہے۔
عالمی منڈی میں تیل کی قیمتیں گرنے کا فائدہ عوام کو دیا جا رہا ہے۔

سولر توانائی کا فروغ اور ایپ کی ملک گیر رسائی

وزیر اعظم نے کہا کہ پاکستان تیزی سے سولرائزیشن کی طرف بڑھ رہا ہے اور شمسی توانائی سستی ترین بجلی فراہم کرتی ہے۔
انہوں نے ہدایت کی کہ "اپنا میٹر، اپنی ریڈنگ” ایپ کو کراچی سے پشاور تک پانچ زبانوں میں متعارف کرایا جائے تاکہ ہر شہری اسے آسانی سے استعمال کر سکے۔
انہوں نے کہا کہ ری بیسنگ کے باوجود قیمت میں اضافہ عوام تک نہ پہنچے، یہ حکومت کی کوشش ہے۔

اس موقع پر وزیر توانائی سردار اویس لغاری نے کہا کہ صارف کو اختیار دینا اور شفافیت وزیر اعظم کا ویژن ہے۔
انہوں نے بتایا کہ اوور بلنگ کی مد میں 110 ارب روپے صارفین کو واپس کیے گئے ہیں اور اب ریڈنگ کا اختیار صارف کے پاس ہے۔