لاہور میں موسم سہانا، بوندا باندی اور ٹھنڈی ہواؤں سے گرمی کا خاتمہ

لاہور: لاہور میں موسم نے اچانک خوشگوار رخ اختیار کر لیا ہے۔ شہر کے مختلف علاقوں میں ہلکی بوندا باندی اور ٹھنڈی ہواؤں کے باعث درجہ حرارت میں واضح کمی آئی ہے، جس سے گرمی اور حبس کا زور ٹوٹ گیا ہے۔

محکمہ موسمیات کے مطابق اس وقت شہر کا درجہ حرارت 28 ڈگری سینٹی گریڈ ریکارڈ کیا جا رہا ہے، جبکہ ہوا میں نمی کا تناسب قدرے بڑھ گیا ہے جو موسم کو مزید خوشگوار بنا رہا ہے۔

محکمہ نے پیشگوئی کی ہے کہ آئندہ چند روز، خاص طور پر جمعہ تک، لاہور اور گرد و نواح میں گرج چمک کے ساتھ تیز بارشوں کا امکان ہے۔ اس دوران کچھ علاقوں میں موسلا دھار بارش بھی ہو سکتی ہے۔

موسم کی اس خوشگوار تبدیلی نے شہریوں کے چہروں پر خوشی بکھیر دی ہے۔ دفاتر، بازاروں اور سڑکوں پر موسم سے لطف اندوز ہوتے شہری نظر آئے۔ تاہم، متعلقہ اداروں نے نشیبی علاقوں میں ممکنہ پانی جمع ہونے کے پیش نظر احتیاط برتنے کی ہدایت کی ہے۔