لاہور: وزیراعلیٰ پنجاب مریم نواز نے بسنت کو پنجاب کا جوش و خروش سے بھرپور ثقافتی تہوار قرار دیتے ہوئے اسے محفوظ بنانے کے لیے اہم حکومتی حکمت عملی کا اعلان کر دیا ہے۔ وزیراعلیٰ مریم نواز نے سماجی رویوں پر تنقید کرتے ہوئے کہا کہ "بچوں کے ذہنوں میں یہ بات بٹھا دی گئی کہ پنجابی بولنا ان پڑھ ہونے کی علامت ہے، جو کہ سراسر غلط ہے”۔ انہوں نے اس سوچ کے تدارک کے لیے مندرجہ ذیل اقدامات بتائے۔
نئی نسل کو پنجابی زبان کی اہمیت سمجھانے کے لیے تعلیمی اور عوامی مقامات پر سائن بورڈز نصب کیے گئے ہیں۔ حکومت پنجاب مادری زبان کے تحفظ اور اس پر فخر کرنے کے کلچر کو فروغ دے رہی ہے۔
بسنت کے حوالے سے عوامی جذبات اور سیکیورٹی کے درمیان توازن برقرار رکھنے کے لیے مریم نواز نے بتایا کہ بسنت کی سرگرمیوں کی نگرانی کے لیے مانیٹرنگ کا مربوط نظام متعارف کروا دیا گیا ہے۔
ان کاکہنا تھا کہ کسی بھی ناخوشگوار صورتحال سے نمٹنے کے لیے ایک مرکزی کنٹرول روم قائم کیا گیا ہے جو براہ راست مانیٹرنگ کرے گا۔
وزیراعلیٰ نے اپنے بیان کے آخر میں کہا کہ بسنت پنجاب کا خوبصورت رنگ ہے اور اسے محفوظ بنا کر ہی اس کا اصل جوش و خروش برقرار رکھا جا سکتا ہے۔
