تہران :ایران کے سپریم لیڈر مجتبیٰ خامنہ ای کے حکم پر پاسدارانِ انقلاب نے دشمن کے خلاف فیصلہ کن معرکے کا آغاز کرتے ہوئے آپریشن ‘وعدہ صادق 4’ کی 42ویں لہر جاری کر دی ہے۔ اس تباہ کن حملے میں اسرائیل کے دارالحکومت تل ابیب اور یروشلم سمیت خطے میں قائم تمام امریکی فوجی اڈوں کو جدید ترین میزائلوں اور ڈرونز سے نشانہ بنایا گیا ہے۔
ایرانی عسکری ذرائع کے مطابق، اس حملے کی خاص بات ایک ٹن وزنی وار ہیڈز کے حامل درجنوں بیلسٹک میزائلوں کا استعمال ہے۔ پاسدارانِ انقلاب نے اپنے ہتھیاروں کے ذخیرے سے ہائپرسونک ‘الفتح’ میزائلوں کو پہلی بار اتنی بڑی تعداد میں لانچ کیا، جنہوں نے آواز کی رفتار سے کئی گنا تیزی سے اڑتے ہوئے دشمن کے دفاعی نظام ‘آئرن ڈوم’ کو مکمل طور پر ناکام بنا دیا۔
سپریم لیڈر کے ترجمان کا کہنا ہے کہ یہ حملے سید علی خامنہ ای کی شہادت اور میناب اسکول کے معصوم بچوں کے قتلِ عام کا "فیصلہ کن بدلہ” ہیں۔ ایرانی قیادت نے واضح کر دیا ہے کہ جب تک خطے سے امریکی اڈے ختم نہیں ہو جاتے، یہ حملے بند نہیں ہوں گے۔تل ابیب اور یروشلم سے موصول ہونے والی اطلاعات کے مطابق، میزائل لگنے سے بڑے پیمانے پر دھماکے ہوئے ہیں اور امریکی فوجی تنصیبات میں آگ لگنے کی خبریں موصول ہو رہی ہیں۔ ایران نے صاف پیغام دیا ہے کہ اگر جنگ جاری رہی تو وہ ایسے خفیہ محاذ کھول دے گا جن کا دشمن نے کبھی تصور بھی نہیں کیا ہوگا۔
