لاہور :حکومتِ پنجاب نے مالی سال 27-2026ء کے سالانہ مالیاتی بجٹ کی تیاری مکمل کر لی ہے، جسے منظوری کے لیے جون کے دوسرے ہفتے میں صوبائی اسمبلی کے اجلاس میں پیش کیا جا رہا ہے۔ نئے بجٹ کا مجموعی حجم 6 ہزار ارب روپے کے لگ بھگ متوقع ہے، جس میں صوبے کی معاشی ترقی کی رفتار تیز کرنے پر توجہ مرکوز کی گئی ہے۔
ذرائع کے مطابق، بجٹ میں ترقیاتی منصوبوں کے لیے ریکارڈ ایک کھرب 600 ارب روپے مختص کرنے کی تجویز دی گئی ہے، جس کا بڑا حصہ سڑکوں کی تعمیر و مرمت، ہسپتالوں اور اسکولوں کی اپ گریڈیشن، زراعت کی جدید کاری، صفائی کے نظام کی بہتری اور امن و امان کے قیام پر خرچ کیا جائے گا۔ مریم نواز حکومت کا ہدف صوبے میں جاری بڑے انفراسٹرکچر پراجیکٹس کو تیزی سے مکمل کرنا ہے۔
بجٹ کے دیگر اہم نکات کے مطابق، مینوفیکچررز اور عوام پر اضافی بوجھ ڈالے بغیر کوئی نیا ٹیکس عائد نہ کرنے کا فیصلہ کیا گیا ہے، جبکہ مہنگائی کے تناسب سے سرکاری ملازمین کی تنخواہوں اور پنشن میں وفاقی حکومت کی طرز پر برابر اضافہ بھی اس بجٹ کا حصہ ہوگا، جس سے صوبے بھر کے لاکھوں ملازمین کو ریلیف ملے گا۔
