اسلام آباد:پاکستان اور یورپی یونین کے مابین اسٹریٹجک اور اقتصادی محاذ پر اہم ترین سفارتی سرگرمیاں تیز ہو گئی ہیں۔ یورپی یونین کی اعلیٰ نمائندہ کاجا کالاس کل پاکستان کا دورہ کریں گی، جہاں وہ دوطرفہ روابط کو اگلے مرحلے پر لے جانے کے لیے اہم مذاکرات کی قیادت کریں گی۔
دفترِ خارجہ کے ترجمان کے مطابق، کاجا کالاس اپنے دورے کے دوران پاک یورپی یونین اسٹریٹجک ڈائیلاگ کے آٹھویں اجلاس کی مشترکہ صدارت کریں گی۔ اس اعلیٰ سطحی بیٹھک میں دوطرفہ تعاون کے فروغ، تجارتی رکاوٹوں کو دور کرنے اور خطے کی موجودہ سیکیورٹی صورتحال پر گہرائی سے غور کیا جائے گا۔
ذرائع کا کہنا ہے کہ اپنے مصروف شیڈول کے دوران یورپی یونین کی اعلیٰ نمائندہ صدرِ پاکستان اور وزیراعظم سے بھی الگ الگ ملاقاتیں کریں گی، جس میں پاک یورپی یونین تعلقات کی مجموعی پیش رفت کا جائزہ لیا جائے گا اور کثیر الجہتی شراکت داری کو مزید مستحکم کرنے کے لیے مشترکہ اعلامیہ جاری ہونے کا بھی امکان ہے۔
