ملکی معیشت کے لیے بڑے فیصلے: وزیراعظم کا ایف بی آر کے نظام میں بڑی سرجری کا حکم

اسلام آباد: وزیراعظم شہباز شریف نے فیڈرل بورڈ آف ریونیو (FBR) کو دو ٹوک پیغام دیتے ہوئے کہا ہے کہ محصولات میں اضافے کے لیے روایتی طریقوں کو چھوڑ کر جدید اور سخت اقدامات اٹھائے جائیں۔ وزیراعظم کی زیرِ صدارت ہونے والے ہنگامی اجلاس میں ٹیکس نظام کی خامیوں کو دور کرنے کے لیے اہم ہدایات جاری کر دی گئیں۔
وزیراعظم نے ایف بی آر کو ہدایت کی کہ ٹیکس چوری کے سدباب کے لیے کسی بھی دباؤ کو خاطر میں لائے بغیر کارروائی کی جائے۔ شہباز شریف نے واضح کیا کہ محصولات میں اضافہ تبھی ممکن ہے جب ٹیکس جمع کرنے والے ادارے کا اپنا نظام شفاف اور کرپشن سے پاک ہو۔
وزیراعظم نے زور دیا کہ ملک کو بیرونی قرضوں سے نجات دلانے کے لیے مقامی سطح پر ٹیکس وصولی کے اہداف کو پورا کرنا ہر صورت لازم ہے۔وزیراعظم نے حکام کو مخاطب کرتے ہوئے کہا کہ پاکستان کی معاشی بقا کا واحد راستہ محصولات میں اضافہ ہے۔ ٹیکس نیٹ سے باہر رہنے والے بااثر افراد کو قانون کے دائرے میں لایا جائے اور محصولات کی راہ میں حائل تمام رکاوٹیں فی الفور دور کی جائیں۔”