اسلام آباد: مشرقِ وسطیٰ میں جنگ کے بڑھتے ہوئے بادلوں کے درمیان پاکستان نے عالمی سطح پر اپنا سفارتی کردار متحرک کر دیا ہے۔ نائب وزیراعظم اور وزیر خارجہ اسحاق ڈار نے یورپی یونین کے نائب صدر سے ٹیلیفونک رابطہ کیا، جس میں خطے کی بدلتی ہوئی صورتحال اور عالمی امن کے قیام پر تفصیلی تبادلہ خیال کیا گیا۔
ترجمان دفتر خارجہ کے مطابق، نائب وزیراعظم نے گفتگو کے دوران واضح کیا کہ موجودہ عالمی تنازعات کا حل صرف اور صرف مستقل مکالمے اور مؤثر سفارتکاری میں ہی پوشیدہ ہے۔ پاکستان خطے میں بڑھتی ہوئی کشیدگی پر گہری تشویش رکھتا ہے اور اس کی روک تھام کے لیے ہر ممکن کوشش کر رہا ہے۔ انہوں نے یورپی یونین کی قیادت پر زور دیا کہ وہ عالمی سطح پر اپنا اثر و رسوخ استعمال کرتے ہوئے فریقین کو مذاکرات کی میز پر لانے میں کردار ادا کرے۔
ٹیلیفونک رابطے کے دوران دونوں رہنماؤں نے مستقبل کے حوالے سے اہم نکات پر اتفاق کیا ۔ دونوں جانب سے اس بات پر اتفاق کیا گیا کہ خطے کی پل پل بدلتی صورتحال پر نظر رکھنے کے لیے پاکستان اور یورپی یونین مستقل اور قریبی رابطے میں رہیں گے۔دونوں رہنماؤں نے عالمی امن و استحکام کو اولین ترجیح قرار دیتے ہوئے اس بات پر زور دیا کہ کسی بھی قسم کا نیا تنازع عالمی معیشت اور سیکیورٹی کے لیے تباہ کن ثابت ہوگا۔
سیاسی مبصرین کے مطابق، اسحاق ڈار کا یہ رابطہ اس بات کی عکاسی کرتا ہے کہ پاکستان نہ صرف مسلم امہ بلکہ عالمی برادری کے بڑے اسٹیک ہولڈرز کے ساتھ مل کر جنگ روکنے کی کوششوں میں پیش پیش ہے۔ نائب صدر یورپی یونین نے خطے میں امن کے لیے پاکستان کے متوازن موقف کی تعریف کی اور باہمی تعاون کو مزید بڑھانے کے عزم کا اعادہ کیا۔
