واشنگٹن: وائٹ ہاؤس کے قریب فائرنگ کے واقعے کے بعد امریکی صدر ڈونلڈ ٹرمپ نے دارالحکومت واشنگٹن ڈی سی میں سیکیورٹی کو مزید مضبوط کرنے کے لیے 500 اضافی سیکیورٹی اہلکار تعینات کرنے کا حکم دے دیا ہے۔ وزیر جنگ پیٹ ہیگسیتھ نے اس فیصلے کا اعلان کرتے ہوئے کہا کہ صدر ٹرمپ نے فوراً اس اقدام کا فیصلہ کیا تاکہ سیکیورٹی کو مزید مستحکم کیا جا سکے اور کسی بھی ممکنہ خطرے سے نمٹا جا سکے۔
وزیر جنگ نے فائرنگ کے واقعے کی شدید مذمت کرتے ہوئے کہا کہ "اہلکاروں پر حملہ کسی صورت برداشت نہیں کیا جائے گا۔” اضافی سیکیورٹی اہلکاروں کی تعیناتی کا مقصد واشنگٹن کی سیکیورٹی میں مزید اضافہ کرنا ہے تاکہ اس طرح کے واقعات کو روکا جا سکے اور عوام میں خوف و ہراس کی صورتحال کو کم کیا جا سکے۔
اس فائرنگ کے نتیجے میں دو نیشنل گارڈز کے اہلکار شدید زخمی ہو گئے ہیں، جن کی حالت تشویشناک بتائی جا رہی ہے۔ امریکی میڈیا کے مطابق، فائرنگ کے فوراً بعد وائٹ ہاؤس کو لاک ڈاؤن کر دیا گیا اور جائے وقوعہ کے اطراف کے علاقے کو گھیرے میں لے لیا گیا تھا۔ پولیس نے حملہ آور کو زخمی حالت میں حراست میں لے لیا ہے اور تحقیقات کا سلسلہ جاری ہے۔
