مریم نواز نے پنجاب میں پہلی الیکٹرک پولیس گاڑی کے ذریعے گرین پیٹرولنگ کا آغاز کر دیا

لاہور میں وزیراعلیٰ پنجاب مریم نواز شریف نے پاکستان کے پہلے گرین پولیسنگ یونٹ کا افتتاح کیا، جس کے تحت پیٹرولنگ کے لیے پہلی بار ماحول دوست الیکٹرک گاڑی متعارف کرائی گئی ہے۔ یہ گاڑی لاہور میں ٹریفک اور پیٹرولنگ کے فرائض انجام دے گی اور فی چارج تقریباً 410 کلومیٹر کا فاصلہ طے کر سکتی ہے۔

افتتاح کے موقع پر وزیراعلیٰ نے گاڑی کا معائنہ کیا اور خود ڈرائیو کر کے اس کی کارکردگی کا تجربہ کیا۔ بریفنگ میں بتایا گیا کہ گاڑی تقریباً 30 منٹ میں 30 سے 80 فیصد چارج ہو جاتی ہے اور اس میں سرویلنس کے لیے پی اے سسٹم، پولیس لائٹس، 360 ڈگری کیمرہ اور اسپیڈ ڈیٹیکشن جیسے جدید آلات نصب ہیں۔

وزیراعلیٰ مریم نواز شریف نے ہدایت دی کہ گرین پولیسنگ یونٹ کو دیگر اضلاع میں بھی مرحلہ وار متعارف کرایا جائے۔ انہوں نے کہا کہ الیکٹرک گاڑیوں کے استعمال سے ایندھن کی بچت ہوگی، آپریشنل لاگت کم ہوگی اور زیرو کاربن اخراج کو یقینی بنایا جا سکے گا، جبکہ صاف ستھری فضا اور جدید گڈ گورننس کے وژن کو فروغ ملے گا۔