لاہور: صوبائی دارالحکومت لاہور دنیا کے آلودہ ترین شہروں میں آج بھی دوسرے نمبر پر ہے، جہاں فضائی آلودگی کی سطح انتہائی خطرناک ہو چکی ہے۔ عالمی ایئر کوالٹی انڈیکس (اے کیو آئی) کے مطابق لاہور میں فضائی آلودگی کی سطح 353 ریکارڈ کی گئی، جو شہریوں کی صحت کے لیے سنگین خطرات کا باعث ہے۔
رپورٹ کے مطابق، بھارتی دارالحکومت نئی دہلی دنیا کے آلودہ ترین شہر کے طور پر سر فہرست ہے، جہاں ایئر کوالٹی انڈیکس 702 تک پہنچ چکا ہے، جو انتہائی تشویشناک ہے۔ لاہور میں بھی فضائی آلودگی کی صورتحال مسلسل بگڑ رہی ہے، اور شہریوں کو سانس کی بیماریوں سمیت دیگر صحت کے مسائل کا سامنا ہے۔
پاکستان کے دیگر بڑے شہروں میں بھی آلودگی کی صورتحال انتہائی تشویشناک ہے۔ گوجرانوالہ میں پارٹیکولیٹ میٹرز (PM) کی تعداد 934، فیصل آباد میں 491، ملتان میں 228 اور پشاور میں اے کیو آئی 172 ریکارڈ کیا گیا ہے، جو کہ ماحول کے لیے خطرناک ثابت ہو سکتے ہیں۔
ماہرین صحت نے شہریوں کو فضائی آلودگی کے اثرات سے بچنے کے لیے ماسک استعمال کرنے کی ہدایت کی ہے۔ اس کے علاوہ، انہیں دن کے مخصوص اوقات میں گھروں میں رہنے اور کھڑکیاں بند رکھنے کی بھی نصیحت کی گئی ہے تاکہ کم سے کم آلودگی کا سامنا ہو۔
ماہرین کے مطابق، فضائی آلودگی میں اضافے کی وجہ سے نہ صرف سانس کی بیماریاں بڑھ رہی ہیں بلکہ دل کی بیماریوں اور دیگر صحت کے مسائل میں بھی اضافہ ہو رہا ہے۔ شہریوں کو فوری طور پر احتیاطی تدابیر اپنانے کی ضرورت ہے تاکہ اس بحران سے نمٹا جا سکے۔
