نیویارک: اقوام متحدہ میں پاکستان کے مستقل مندوب عاصم افتخار نے کہا ہے کہ روس اور یوکرین کے درمیان جاری جنگ کا کوئی فوجی حل نہیں ہے اور مسائل کے حل کے لیے مذاکرات کا راستہ اپنانا ضروری ہے۔
اپنے خطاب میں انہوں نے کہا کہ پاکستان سفارتکاری کے ذریعے تنازعات کے حل کا حامی ہے۔ انہوں نے خبردار کیا کہ جنگ کے نتیجے میں عام شہریوں کو مشکلات کا سامنا ہے اور عالمی قوانین کے مطابق شہریوں اور انفراسٹرکچر کی حفاظت یقینی بنائی جائے۔
واضح رہے کہ امریکی میڈیا نے رپورٹ کیا ہے کہ ٹرمپ انتظامیہ خفیہ طور پر روس کے ساتھ مشاورت میں یوکرین جنگ کے خاتمے کے لیے نیا منصوبہ تیار کر رہی ہے، جس کی قیادت امریکی خصوصی ایلچی اسٹیو وٹکوف کر رہے ہیں۔
