اسلام آباد: قومی اسمبلی میں قائد حزب اختلاف کی خالی نشست کے لیے پاکستان تحریک انصاف (پی ٹی آئی) نے محمود خان اچکزئی کو نامزد کیا ہے، جس پر جمعیت علماء اسلام (ف) کے سربراہ مولانا فضل الرحمٰن نے حمایت کا اعلان کیا۔
پی ٹی آئی کے وفد میں اسد قیصر، جنید اکبر اور شہرام خان ترکئی شامل تھے، جبکہ جے یو آئی-ف کی طرف سے مولانا صلاح الدین ایوبی، ایڈووکیٹ جلال الدین اور مولانا اسجد محمود موجود تھے۔
ملاقات میں اپوزیشن کو متحد کرنے، سینیٹ کی خالی نشست، اور خیبر پختونخوا میں امن و امان کے لیے قومی جرگہ بلانے جیسے امور پر بات چیت ہوئی۔ مولانا فضل الرحمٰن نے جرگے کی تجویز کو خوش آئند قرار دیا۔
اس دوران فیصلہ کیا گیا کہ تحریک تحفظ آئین پاکستان نومبر میں ملک بھر میں عوامی اجتماعات کرے گی۔
یہ پیش رفت اس وقت سامنے آئی ہے جب پی ٹی آئی کے سیکریٹری جنرل سلمان اکرم راجہ نے پہلے کہا تھا کہ جے یو آئی-ف اس عہدے کے لیے حمایت نہیں کرے گی، تاہم اب دونوں جماعتوں کے درمیان اتفاق ہو گیا ہے۔
