ننکانہ صاحب: بابا گورو نانک دیو جی کے 556 ویں جنم دن کی تین روزہ تقریبات آج اپنے اختتام کو پہنچ رہی ہیں۔ اس موقع پر ننکانہ صاحب میں تعلیمی اداروں میں عام تعطیل ہے۔ مرکزی تقریب کے اختتام پر ایک عظیم نگر کیرتن جلوس نکالا جائے گا، جو گوردوارہ جنم استھان سے شروع ہو کر سات گوردواروں سے ہوتا ہوا گوردوارہ کیارہ صاحب پہنچ کر اختتام پذیر ہوگا۔
تقریبات میں دنیا بھر سے سکھ یاتری شریک ہیں، جن میں بھارت، برطانیہ، فرانس، کینیڈا، امریکہ اور دیگر ممالک سے ہزاروں افراد شامل ہیں۔ اس موقع پر یاتریوں نے اپنے مقدس مقامات کی زیارت کی اور پاکستان حکومت کے بہترین انتظامات پر شکریہ ادا کیا۔ رات کو بھوگ کی رسم کے ساتھ تین روزہ مذہبی پروگرام کا اختتام کیا جائے گا۔
ضلع انتظامیہ کی جانب سے سیکیورٹی کے انتہائی سخت انتظامات کیے گئے ہیں۔ گوردوارہ جات اور نگر کیرتن کے راستوں پر سی سی ٹی وی کیمرے نصب کیے گئے ہیں، جبکہ واک تھرو گیٹس اور سکینر بھی گوردواروں کے داخلی راستوں پر نصب کیے گئے ہیں۔ اس کے علاوہ، غیر متعلقہ افراد کے داخلے کو روکنے کے لیے خار دار تاریں اور بیئرز لگا کر گوردواروں اور نگر کیرتن کے راستوں پر سیکیورٹی کو مزید مستحکم کیا گیا ہے.
بھارت سے تقریباً 2100 سکھ یاتری اس مذہبی دورے کے لیے ننکانہ صاحب آئے ہیں اور وہ 13 نومبر کو واپس روانہ ہوں گے۔ یاتریوں نے پاکستان کی حکومت اور انتظامیہ کی طرف سے کیے گئے انتظامات پر اطمینان کا اظہار کیا ہے اور اپنے مذہبی جذبات کے احترام میں خوشی کا اظہار کیا ہے۔
وفاقی وزیر داخلہ محسن نقوی نے سکھ برادری کو بابا گورو نانک دیو جی کے جنم دن کی مبارکباد دی۔ انہوں نے کہا، "بابا گورو نانک نے انسانیت کو محبت، بھائی چارہ، سچائی اور امن کا پیغام دیا۔ وہ مذہبی رواداری اور بین المذاہب ہم آہنگی کی بہترین مثال تھے۔”
انہوں نے مزید کہا کہ "کرتارپور راہداری پاکستان کے بین المذاہب ہم آہنگی اور رواداری کے عزم کا عالمی سطح پر ایک روشن نمونہ ہے، اور پاکستان میں تمام اقلیتوں کے حقوق کا تحفظ ہماری ذمہ داری ہے۔”
