راولپنڈی: ترجمان پاک فوج لیفٹیننٹ جنرل احمد شریف چودھری نے حال ہی میں تعلیمی اداروں کے طلبہ و اساتذہ کے ساتھ ایک خصوصی نشست کی، جس میں ملک کی موجودہ صورتحال اور افواج پاکستان کی قربانیوں پر تفصیل سے بات کی گئی۔ اس نشست میں کانونٹ آف جیسس اینڈ میری، بیکن ہاؤس، اور روٹس سکول سسٹم کے طلبہ و طالبات اور اساتذہ نے شرکت کی۔
پاک فوج کے شعبہ آئی ایس پی آر کے مطابق، اس نشست میں لیفٹیننٹ جنرل احمد شریف چودھری نے افواج پاکستان کے آپریشنل امور اور داخلی صورتحال کے حوالے سے طلبہ کو آگاہ کیا۔ اس موقع پر، کانونٹ آف جیسس اینڈ میری سکول کے پرنسپل نے پاک فوج کی قربانیوں کو خراج تحسین پیش کیا، اور اساتذہ و طلباء نے اپنے خیالات کا اظہار کیا۔ طلبہ نے اس موقع کو ایک بڑا اعزاز قرار دیا، کیونکہ انہیں براہ راست آرمی کے نمائندے سے بات چیت کا موقع ملا۔
طالبات و طلباء نے اس بات پر فخر کا اظہار کیا کہ پاکستانی مسلح افواج ہر وقت اپنی جانیں قربان کرنے کے لیے تیار ہیں۔ ڈی جی آئی ایس پی آر نے طلباء کو حقائق کو درست نقطہ نظر سے دیکھنے کی اہمیت بتائی اور سوشل میڈیا پر پھیلنے والے پروپیگنڈے اور گمراہ کن معلومات کے بارے میں آگاہی دی۔ اس کے علاوہ، اساتذہ نے کہا کہ اس نشست نے انہیں سکھایا کہ کیسے اپنے ازلی دشمن کے تزویراتی تکبر کا مقابلہ کیا جائے اور پاک فوج کے عزم و بہادری پر انہیں فخر ہے۔
نشست کے دوران طلبہ نے اس بات کا بھی عہد کیا کہ بطور ذمہ دار شہری انہیں سوشل میڈیا پر پھیلنے والے پروپیگنڈے سے خود کو بچانا ہے۔ انہوں نے مزید کہا کہ میڈیا پر پھیلائی جانے والی خبروں میں سچائی جاننے کے لیے تحقیق کرنا ضروری ہے۔ طلباء نے یہ بھی کہا کہ پاک فوج اور پاکستانی عوام نے مل کر بھارت کے خلاف ایک مضبوط اتحاد قائم کیا ۔
خصوصی نشست کے اختتام پر طلبہ نے یہ سمجھا کہ کس طرح پاک فوج دہشت گردی کے خلاف جنگ میں ملک کی حفاظت کر رہی ہے، اور اس کے کردار کو سراہا۔
