اسلام آباد: وزیراعظم محمد شہباز شریف نے عید الفطر کے موقع پر سفارتی محاذ پر متحرک ہوتے ہوئے برادر اسلامی ممالک کی قیادت سے ٹیلیفونک رابطہ کیا ہے۔ وزیراعظم نے ملائیشیا کے وزیراعظم انور ابراہیم اور آذربائیجان کے صدر الہام علیوف کو فون کیا اور انہیں پاکستانی عوام کی جانب سے عید کی دلی مبارکباد پیش کی۔
گفتگو کے دوران وزیراعظم نے امتِ مسلمہ کی صفوں میں اتحاد اور یگانگت کے لیے خصوصی دعا کی، تاکہ مسلم ممالک مل کر عالمی چیلنجز کا مقابلہ کر سکیں۔مبارکباد کے تبادلے کے ساتھ ساتھ رہنماؤں نے آپسی تعلقات کو مزید مضبوط بنانے اور تعاون کے نئے راستے تلاش کرنے پر بھی زور دیا۔
ملائیشیا اور آذربائیجان کے سربراہان نے وزیراعظم شہباز شریف کا شکریہ ادا کیا اور پاکستانی عوام کے لیے اپنی مخلصانہ محبت اور عید کی نیک تمناؤں کا اظہار کیا۔
ماہرین کے مطابق، عید کے موقع پر یہ رابطے پاکستان کی "برادرانہ خارجہ پالیسی” کا حصہ ہیں، جس کا مقصد مسلم ممالک کے ساتھ تعلقات میں گرمجوشی پیدا کرنا اور مشترکہ مفادات پر یکسوئی حاصل کرنا ہے۔
