اسلام آباد:وفاقی وزیر اطلاعات عطا تارڑ نے کہا ہے کہ پاکستان نے ‘معرکہ حق’ میں نہ صرف عسکری بلکہ سفارتی سطح پر بھی بڑی کامیابی حاصل کی ہے، جس کے بعد دنیا پاکستان کو امن کے ایک مضبوط علمبردار کے طور پر دیکھ رہی ہے۔
خصوصی تقریب سے خطاب کرتے ہوئے وفاقی وزیر نے کہا کہ کلبھوشن یادیو کی رنگے ہاتھوں گرفتاری پاکستان کی انٹیلی جنس اور سفارتی برتری کا منہ بولتا ثبوت ہے۔ انہوں نے کہا کہ بھارت اس حقیقت کو چھپا نہیں سکتا کہ اس کا حاضر سروس افسر پاکستان کی حراست میں ہے، اور اب وقت نے تمام حقائق دنیا کے سامنے واضح کر دیے ہیں۔
عطا تارڑ نے ملکی ساکھ پر بات کرتے ہوئے درج ذیل پہلوؤں کو اجاگر کیا۔ دنیا بھر کی قیادت آج پاکستان کی عسکری اور سفارتی حکمت عملی کی معترف ہو چکی ہے۔ پاکستان عالمی افق پر ایک بار پھر اپنی پوری آب و تاب کے ساتھ چمک رہا ہے۔پاکستانی عوام نے اپنے رویے اور بیانیے سے ثابت کیا کہ ہم ایک ذمہ دار اور امن پسند قوم ہیں۔
انہوں نے ‘بیانیے کی جنگ’ میں پاکستانی نوجوانوں کے کلیدی کردار کو سراہتے ہوئے کہا کہ ہمارے نوجوانوں نے دشمن کے جھوٹے پروپیگنڈے کو سچائی کے ذریعے ناکام بنایا۔ ان کا کہنا تھا کہ معرکہ حق میں نوجوانوں کا جذبہ قابلِ ستائش ہے، جنہوں نے عالمی سطح پر پاکستان کا مثبت چہرہ پیش کرنے میں کوئی کسر نہیں چھوڑی۔
