کوئٹہ: پاکستان پیپلز پارٹی کے چیئرمین بلاول بھٹو زرداری نے عید کے فوراً بعد بلوچستان میں ترقیاتی منصوبوں کے دوسرے مرحلے کا آغاز کرنے کا اعلان کرتے ہوئے کہا ہے کہ پسماندہ علاقوں میں بنیادی سہولیات کی فراہمی ان کی حکومت کی اولین ترجیح ہے۔ کوئٹہ میں 11 بڑے منصوبوں کا افتتاح کرتے ہوئے انہوں نے واضح کیا کہ وہ عید کے بعد مزید عوامی منصوبوں کی سنگِ بنیاد رکھنے کے لیے جلد دوبارہ بلوچستان کا دورہ کریں گے۔
تقریب سے خطاب کرتے ہوئے بلاول بھٹو کا کہنا تھا کہ تعلیم اور صحت کے شعبوں کا براہِ راست تعلق عوام سے ہے اور پیپلز پارٹی عوام دوست سیاست پر یقین رکھتی ہے۔ انہوں نے کہا کہ غریب ہونے کا مطلب یہ نہیں کہ آپ کو معیاری علاج کی سہولت نہ ملے، بلکہ مفت علاج ہر شہری کا حق ہے۔ انہوں نے نومنتخب ٹراما سینٹر کو صوبے کا پہلا بہترین پبلک ہسپتال قرار دیتے ہوئے کہا کہ اس کی سروسز کا مقابلہ پورے پاکستان سے کیا جائے گا۔
چیئرمین پیپلز پارٹی نے ملکی و عالمی معاشی صورتحال پر گفتگو کرتے ہوئے کہا کہ دنیا بھر میں جاری معاشی مشکلات اگر بحران میں تبدیل ہوئیں تو اس سے غریب طبقہ سب سے زیادہ متاثر ہوگا۔ تاہم، بلوچستان قدرتی وسائل سے مالامال ہے اور وزیراعلیٰ بلوچستان نے دو سال کے دوران متعدد منصوبے مکمل کر کے بہترین کارکردگی دکھائی ہے۔ ان کا کہنا تھا کہ وہ سندھ کی طرز پر بلوچستان کے ہر شہری کو گھر کی دہلیز پر مفت اور معیاری علاج پہنچانے کے عزم پر قائم ہیں۔
