دبئی : صدر مملکت آصف علی زرداری اور متحدہ عرب امارات کے نائب صدر و وزیراعظم شیخ محمد بن راشد المکتوم کے درمیان دبئی میں ہونے والی ملاقات نے دوطرفہ تعلقات میں ایک نئی روح پھونک دی ہے۔ اس ملاقات کا بنیادی محور پاکستان میں غیر ملکی سرمایہ کاری اور جدید ٹیکنالوجی کا فروغ رہا۔
ملاقات میں دونوں رہنماؤں نے دو طرفہ تعلقات کو مزید مستحکم بنانےکے عزم کا اعادہ کرتے ہوئے درج ذیل اہم شعبوں پاکستان میں جدید لاجسٹکس اور مواصلاتی ڈھانچے کی بہتری کے لیے اماراتی تعاون ، ٹیکنالوجی اور ڈیجیٹل فنانس کے شعبے میں مشترکہ منصوبوں کا آغاز، اقتصادی اور تجارتی رکاوٹوں کو دور کر کے باہمی تجارت کو نئی بلندیوں تک لے جانے پر اتفاق کیاگیا۔
صدر آصف علی زرداری نے شیخ محمد بن راشد المکتوم کی دور اندیش قیادت کو سراہتے ہوئے انہیں پاکستان کے دورے کی باضابطہ دعوت دی۔ صدر مملکت نے واضح کیا کہ پاکستان یو اے ای کے ساتھ اپنے تعلقات کو محض برادرانہ ہی نہیں بلکہ ایک مضبوط معاشی شراکت داری کے طور پر دیکھتا ہے۔یہ ملاقات ظاہر کرتی ہے کہ پاکستان اب روایتی شعبوں سے ہٹ کر ٹیکنالوجی اور ڈیجیٹل فنانس جیسے جدید شعبوں میں عرب ممالک کی سرمایہ کاری لانے میں سنجیدہ ہے۔
