لاہور: وزیراعلیٰ پنجاب مریم نواز آج میانوالی اور مظفرگڑھ کے اہم دورے پر روانہ ہوں گی۔ میانوالی میں وہ جدید الیکٹرک بس سروس کا افتتاح کریں گی، جس کے تحت ابتدائی مرحلے میں 15 ماحول دوست بسیں شہر میں چلائی جائیں گی۔
الیکٹرک بسوں کا یہ منصوبہ شہریوں کو بہتر اور سستی سفری سہولیات فراہم کرنے کی جانب ایک بڑا قدم قرار دیا جا رہا ہے۔
بعد ازاں، وزیراعلیٰ مظفرگڑھ کے علاقے علی پور پہنچیں گی، جہاں وہ ایک سکول میں قائم فلڈ ریلیف کیمپ کا معائنہ کریں گی۔ اس موقع پر مریم نواز سیلاب متاثرین سے ملاقات کریں گی اور ان کی شکایات اور مسائل سنیں گی۔
علاقے میں جاری ریسکیو اور ریلیف آپریشن پر بھی وزیراعلیٰ کو تفصیلی بریفنگ دی جائے گی۔ حکام کا کہنا ہے کہ وزیراعلیٰ کا یہ دورہ متاثرہ علاقوں میں ریلیف کاموں کی نگرانی اور سہولیات کی فراہمی کو یقینی بنانے کے لیے اہم ہے۔
