کیلیفورنیا:جنرل موٹرز نے 2027 شیورلیٹ سلوراڈو 1500 اور جی ایم سی سیرا 1500 کے لیے نئے انجن اور دیگر اہم اپ ڈیٹس متعارف کرانے کی تیاری کر لی ہے، تاہم ان تبدیلیوں کے ساتھ دونوں پک اپ ٹرکس کی فیول اکانومی میں کمی بھی سامنے آئی ہے۔ تازہ امریکی EPA اعدادوشمار کے مطابق بیشتر ماڈل کنفیگریشنز کی مائلیج 2026 کے مقابلے میں 1 سے 3 میل فی گیلن (MPG) تک کم ہوگئی ہے۔
2027 ماڈل ایئر کے لیے دونوں گاڑیوں میں نئے سمال بلاک V8 انجن، بہتر ٹرانسمیشنز اور ایکسٹیریئر و انٹیریئر ڈیزائن میں تبدیلیاں شامل کی گئی ہیں۔ انجن لائن اپ میں 5.3 لیٹر V8 کی جگہ 5.7 لیٹر جبکہ 6.2 لیٹر V8 کی جگہ زیادہ گنجائش والا 6.6 لیٹر V8 انجن لے رہا ہے۔ نئے انجن زیادہ ہارس پاور اور ٹارک فراہم کرنے کی صلاحیت رکھتے ہیں، لیکن اس اضافی طاقت کے ساتھ ایندھن کی کھپت میں بھی اضافہ ہوا ہے۔
دوسری جانب 3.0 لیٹر ٹربو ڈیزل انجن کی کارکردگی کے اعدادوشمار بھی توقعات سے مختلف رہے ہیں۔ اگرچہ اس انجن کی گنجائش میں کوئی تبدیلی نہیں کی گئی، تاہم 2027 ماڈلز کی بعض کنفیگریشنز میں گزشتہ سال کے مقابلے میں 3 ایم پی جی تک کمی ریکارڈ کی گئی ہے۔
فیول اکانومی کے معاملے میں جی ایم سی سیرا AT4X کا 3.0 لیٹر ٹربو ڈیزل ورژن نمایاں رہا، جو دونوں کمپنیوں کے زیرِ جائزہ ماڈلز میں واحد کنفیگریشن ہے جس کی مائلیج بہتر ہوئی ہے۔ اس کی سٹی ڈرائیونگ میں فیول اکانومی 1 ایم پی جی، ہائی وے پر 2 ایم پی جی جبکہ مجموعی ریٹنگ میں بھی 2 ایم پی جی کا اضافہ ہوا ہے۔
EPA کی جانب سے 2.7 لیٹر ٹربو چارجڈ چار سلنڈر انجن کی حتمی فیول اکانومی ریٹنگز تاحال جاری نہیں کی گئیں۔ ان اعدادوشمار کے بعد 2027 ماڈلز کے تمام انجن آپشنز کا مکمل تقابلی جائزہ ممکن ہوگا۔
نئے ماڈلز میں انجن کی طاقت، ٹارک اور ڈرائیونگ پرفارمنس کو بہتر بنانے پر توجہ دی گئی ہے، تاہم فیول اکانومی کے تازہ اعدادوشمار ظاہر کرتے ہیں کہ اس اپ گریڈ کی قیمت زیادہ تر کنفیگریشنز میں ایندھن کی بچت کی صورت میں ادا کرنا پڑ سکتی ہے۔
