بیجنگ :وزیراعظم شہباز شریف کے دورۂ چین کے دوران بیجنگ میں ایک انتہائی اہم معاشی و تزویراتی کامیابی حاصل ہوئی ہے، جہاں پاکستان اور چین نے باہمی اشتراک کو مزید مضبوط بنانے کے لیے 15 تاریخی یادداشتوں اور پروٹوکولز پر باقاعدہ دستخط کر دیے ہیں۔ دستخطوں کی اس پروقار تقریب میں دونوں ممالک کے وزرائے اعظم نے خصوصی طور پر شرکت کی اور اسٹریٹجک شراکت داری کے اس نئے عزم کی توثیق کی۔
ان تاریخی معاہدوں کے تحت پاکستان سے مکئی اور خشک میوہ جات کی چین برآمد کے لیے قرنطینہ اور نباتاتی صحت کے جدید پروٹوکولز پر اتفاق کیا گیا ہے، جو ملکی برآمدی شعبے کے لیے ایک بڑی خوشخبری ہے۔ اس کے ساتھ ساتھ زراعتی ترقی کے لیے چین کی جانب سے پاکستان کو ویٹرنری ویکسین عطیہ کرنے کی دستاویز، اور موسمیاتی تبدیلی کے سنگین خطرات سے مل کر نمٹنے کے لیے ماحولیاتی تعاون کے ایک جامع معاہدے کو بھی حتمی شکل دی گئی ہے۔
میڈیا اور ثقافتی روابط کے فروغ کے لیے چین کی مقتدر سرکاری خبر رساں ایجنسی "شینہوا” اور ریڈیو پاکستان (پاکستان براڈ کاسٹنگ کارپوریشن) کے مابین بھی اشتراکِ عمل کا معاہدہ طے پایا ہے، جبکہ سائنس و ٹیکنالوجی اور عوامی تبادلوں کے شعبوں میں بھی دستخط کیے گئے ہیں۔ پاکستان کی جانب سے ان مقتدر سفارتی و معاشی دستاویزات پر وفاقی وزراء احسن اقبال، رانا تنویر حسین اور عطا اللہ تارڑ نے دستخط کیے، جو اس دورے کو پاکستان کے لیے انتہائی سودمند اور دور رس نتائج کا حامل قرار دے رہے ہیں۔
