پاکستان ناروے تعلقات میں پیش رفت، شہباز شریف کی ناروے کے وزیراعظم کو دورہ پاکستان کی دعوت

اسلام آباد: وزیراعظم شہباز شریف سے ناروے کے وزیر خارجہ نے ملاقات کی، جس میں پاکستان اور ناروے کے دوطرفہ تعلقات سمیت علاقائی اور عالمی صورتحال پر تفصیلی تبادلہ خیال کیا گیا۔

وزیراعظم شہباز شریف نے ناروے کے وزیر خارجہ کا خیرمقدم کرتے ہوئے پاکستان اور ناروے کے تعلقات پر اطمینان کا اظہار کیا۔ وزیراعظم نے نارویجن کمپنیوں کو پاکستان میں تیل اور گیس کی تلاش کے شعبے میں سرمایہ کاری کی دعوت بھی دی۔

ملاقات میں فلسطین کی حمایت میں ناروے کے مضبوط اور اصولی مؤقف کو سراہا گیا۔ وزیراعظم نے امن کے لیے پاکستان کی کوششوں کی مسلسل حمایت پر ناروے کا شکریہ ادا کیا۔

ناروے کے وزیر خارجہ نے پرتپاک استقبال پر وزیراعظم شہباز شریف کا شکریہ ادا کیا اور ناروے میں مقیم پاکستانی کمیونٹی کے مثبت کردار کو خصوصی طور پر سراہا۔

وزیراعظم شہباز شریف نے ناروے کے وزیراعظم کو پاکستان کے سرکاری دورے کی دعوت بھی دی، جس سے دونوں ممالک کے درمیان تعلقات کو مزید فروغ دینے کے عزم کا اظہار ہوتا ہے۔