اوپن اے آئی نے مئی 2024 سے جولائی 2025 کے دوران 15 لاکھ سے زائد چیٹ جی پی ٹی کی گفتگوؤں کا تجزیہ کرتے ہوئے اپنی سب سے بڑی تحقیق جاری کی ہے، جس سے پتہ چلتا ہے کہ یہ ٹول اب صرف کام کے لیے نہیں بلکہ روزمرہ زندگی کا حصہ بن چکا ہے۔
ہارورڈ یونیورسٹی کے ماہرِ معاشیات ڈیوڈ ڈیمِنگ کے تعاون سے تیار کردہ رپورٹ میں بتایا گیا ہے کہ چیٹ جی پی ٹی پر ہونے والی گفتگوؤں میں 73 فیصد ذاتی نوعیت کی تھیں، جو گزشتہ سال کے مقابلے میں کافی اضافہ ہے۔ صارفین اس پلیٹ فارم کو معلومات حاصل کرنے، تحریری کاموں، ای میل ڈرافٹ کرنے، ذاتی اظہار اور تخلیقی سرگرمیوں کے لیے استعمال کرتے ہیں۔
رپورٹ کے مطابق مرد صارفین کی تعداد ابتدا میں 80 فیصد تھی، مگر اب خواتین صارفین کی تعداد بڑھ کر 52 فیصد ہو چکی ہے۔ خواتین زیادہ تر تحریری مدد اور عملی رہنمائی کے لیے اس ٹول کا استعمال کرتی ہیں، جب کہ مرد زیادہ تر تکنیکی معلومات کے لیے رجوع کرتے ہیں۔
مزید برآں، ترقی پذیر ممالک میں چیٹ جی پی ٹی کی قبولیت کی رفتار زیادہ ہے اور یہ ترقی یافتہ ممالک کے مقابلے میں چار گنا زیادہ تیزی سے بڑھ رہی ہے، جو اس کی عالمی مقبولیت کی نشاندہی کرتی ہے۔
اعدادوشمار سے پتہ چلتا ہے کہ جون 2025 تک چیٹ جی پی ٹی پر ہونے والی گفتگوؤں کا 49 فیصد معلومات اور رہنمائی سے متعلق، 40 فیصد عملی کاموں جیسے ای میل یا منصوبہ بندی پر، اور 11 فیصد تخلیقی یا ذاتی گفتگو پر مشتمل تھی۔
ماہرین کے مطابق، چیٹ جی پی ٹی اب صارفین کے روزمرہ کے کاموں کا ایک لازمی حصہ بن چکا ہے اور ایک جدید معاون کے طور پر کام کر رہا ہے۔
