واشنگٹن: امریکا کے صدر ڈونلڈ ٹرمپ نے بائیڈن انتظامیہ پر شدید تنقید کرتے ہوئے کہا کہ ان کی حکومت نے قاتلوں کو امریکا میں داخلے کی اجازت دی، اور اب وہ غیرقانونی تارکین وطن کو ملک میں داخل ہونے نہیں دیں گے۔ ٹرمپ نے اپنے خطاب میں بائیڈن کی پالیسیوں کو نشانہ بناتے ہوئے دعویٰ کیا کہ ان کی قیادت میں امریکا کی معیشت اور قومی سلامتی میں نمایاں بہتری آئی۔
ٹرمپ کا کہنا تھا کہ ان کو کرپٹ نظام کو ختم کرنے کے لیے ایک بھاری مینڈیٹ ملا تھا، اور انہوں نے ایک سال کے اندر جو کامیابیاں حاصل کیں، وہ کسی اور حکومت کے بس کا کام نہیں تھا۔ ان کے مطابق، ان کی حکومت نے 10 ماہ میں 8 جنگوں کو روکا، ایران کے جوہری خطرے کو ناکام بنایا، اور غزہ میں امن قائم کرکے تین ہزار سال میں پہلی بار جنگ کو ختم کیا۔
ٹرمپ نے مزید کہا کہ امریکا کو نئے صدر کی ضرورت ہے نہ کہ ایک نئے قانون ساز کی۔ ان کے دور میں امریکا بدترین حالات سے بہترین حالت میں تبدیل ہو گیا۔ انہوں نے دعویٰ کیا کہ ان کی حکومت میں اشیاء کی قیمتوں میں کمی آئی، امریکیوں کی تنخواہیں بڑھیں، معیشت میں تیزی آئی، اور برسر روزگار افراد کی تعداد میں اضافہ ہوا۔
ٹرمپ نے کہا کہ ایک سال پہلے امریکا "مردہ” تھا اور ناکامی کے دہانے پر تھا، لیکن ان کی قیادت میں کھربوں ڈالر کی سرمایہ کاری ممکن ہوئی اور ٹیکسوں میں کمی کے فوائد آئندہ سالوں میں نظر آئیں گے۔ انہوں نے امریکی معیشت کو بہتر بنانے کے لیے ٹیرف کی پالیسی کی بھی حمایت کی۔
بائیڈن انتظامیہ کی گرین انرجی اسکیم پر تنقید کرتے ہوئے ٹرمپ نے کہا کہ بائیڈن کے دور میں غیرقانونی تارکین وطن نے امریکیوں کی نوکریاں چھین لی ہیں۔ ان کا دعویٰ تھا کہ ان کی حکومت میں ساری نئی نوکریاں امریکا میں پیدا ہوئی تھیں، اور وہ امریکا کو دوبارہ عظیم بنا رہے ہیں۔ انہوں نے یہ بھی کہا کہ ان کی حکومت نے ملک کی سرحدوں کو محفوظ بنایا۔
آخر میں، ٹرمپ نے کہا کہ وہ بائیڈن کی پالیسیاں دوبارہ نافذ نہیں ہونے دیں گے اور امریکی فوجیوں کے لیے کرسمس پر فی کس 1776 ڈالر دینے کا اعلان کیا۔
