فلکیات کے شوقین افراد کے لیے آج ایک بہترین موقع ہے کہ وہ نظام شمسی کے سب سے بڑے سیارے مشتری کو براہِ راست دیکھ سکیں۔ سپارکو کے ترجمان کے مطابق مشتری آج شام 6:34 بجے سے لے کر کل صبح 6:45 بجے تک پاکستان کے آسمان پر نظر آئے گا۔
ماہرین کا کہنا ہے کہ مشتری غروبِ آفتاب کے وقت طلوع ہوگا اور پوری رات آسمان میں موجود رہے گا۔ اس کی روشنی اور حجم اسے سب ستاروں سے نمایاں اور چمکدار بناتے ہیں، جس کی وجہ سے یہ آسانی سے پہچانا جا سکے گا۔
شوقین افراد چاہیں تو دوربین یا فلکیاتی آلات کی مدد سے اس سیارے کا بہتر مشاہدہ کر سکتے ہیں۔ یہ فلکیاتی واقعہ نہ صرف علمِ فلکیات کے شوقین بلکہ عام عوام کے لیے بھی رات کے آسمان کی خوبصورتی سے لطف اندوز ہونے کا بہترین موقع فراہم کرتا ہے۔
