لاہور میں بارش سے موسم سرد، آلودگی میں کمی، درجہ حرارت مزید گرنے کا امکان

لاہور میں رات گئے سے شروع ہونے والی بارش وقفے وقفے سے جاری ہے جس کے باعث شہر کا موسم سرد ہو گیا ہے۔ بارش کے بعد شہر کے مختلف علاقوں میں ٹھنڈ میں اضافہ محسوس کیا جا رہا ہے جبکہ آسمان پر سیاہ بادل چھائے ہوئے ہیں۔

بارش کے نتیجے میں دھند اور فضائی آلودگی میں واضح کمی آئی ہے، جس سے شہریوں کو ریلیف ملا ہے۔ محکمہ موسمیات کے مطابق آج شہر میں کم سے کم درجہ حرارت 3 ڈگری سینٹی گریڈ تک پہنچنے کا امکان ہے، جبکہ سرد موسم آئندہ چند دن برقرار رہنے کی پیشگوئی کی گئی ہے۔

محکمہ موسمیات نے شہریوں کو سردی سے بچاؤ کے لیے احتیاط برتنے اور غیر ضروری سفر سے گریز کرنے کی ہدایت کی ہے۔