نہروں کے انتظام کا معاملہ: وزیراعظم شہباز شریف کا فیصلہ کن اجلاس آج، اہم فیصلے متوقع

اسلام آباد: وفاقی دارالحکومت میں پانی کی تقسیم اور نہری نظام کی بہتری کے حوالے سے بڑی پیش رفت سامنے آئی ہے۔ وزیراعظم شہباز شریف نے مشترکہ مفادات کونسل (CCI) کے فیصلوں پر عملدرآمد کی حکمت عملی طے کرنے کے لیے آج اعلیٰ سطحی اجلاس طلب کر لیا ہے۔
اجلاس کا ون پوائنٹ ایجنڈا نہروں کے معاملے پر صوبائی اور وفاقی سطح پر اتفاقِ رائے پیدا کرنا ہے۔ سی سی آئی نے ماضی میں نہروں کے انتظام اور پانی کی منصفانہ تقسیم کے حوالے سے جو فیصلے دیے تھے، ان پر عملدرآمد کے لیے حائل رکاوٹیں دور کرنے پر مشاورت کی جائے گی۔وزیراعظم سی سی آئی کے فیصلوں کو آئینی روح کے مطابق نافذ کرنے کے لیے قانونی ماہرین اور متعلقہ حکام سے رائے لیں گے۔ نہروں کے معاملے کو حل کر کے ملک کے زرعی شعبے کو پانی کی بلا تعطل فراہمی یقینی بنانا وزیراعظم کی ترجیحات میں شامل ہے۔
اجلاس میں نہروں میں پانی کے بہاؤ کی مانیٹرنگ کے جدید نظام پر بھی بات چیت کا امکان ہے۔حکومتی ذرائع کا کہنا ہے کہ وزیراعظم اس اجلاس کے ذریعے پانی کی تقسیم کے دیرینہ تنازعات کو مستقل بنیادوں پر حل کرنا چاہتے ہیں تاکہ وفاق اور صوبوں کے درمیان مثالی تعاون قائم ہو سکے۔