قصور : قصور کے تاریخی گنڈا سنگھ والا بارڈر پر "معرکہ حق” اور "آپریشن بنیان مرصوص” کی پہلی سالگرہ کے موقع پر ایک پروقار تقریب منعقد کی گئی، جس میں پاک فوج کے شاہینوں نے اپنی پیشہ ورانہ مہارت اور جنگی عزم کا بھرپور مظاہرہ کیا۔
تقریب کا آغاز انتہائی جوش و خروش سے ہوا، جہاں پاک فوج کے چاق و چوبند دستوں نے مارچ پاسٹ کیا اور حاضرین کو اپنی فولادی قوت کا احساس دلایا۔ پریڈ کے دوران جوانوں کے بلند حوصلوں اور نظم و ضبط نے نہ صرف شرکاء کے دل جیت لیے بلکہ یہ پیغام بھی واضح کر دیا کہ وطنِ عزیز کا دفاع ناقابلِ تسخیر ہاتھوں میں ہے۔
اس تاریخی دن کی مناسبت سے شہریوں کی بہت بڑی تعداد گنڈا سنگھ بارڈر پر جمع ہوئی۔ بوڑھوں، جوانوں اور بچوں نے پاک فوج کے حق میں فلک شگاف نعرے بلند کیے۔ عوام نے سرحدوں کے محافظوں کے ساتھ مکمل یکجہتی کا اظہار کرتے ہوئے اس بات کا اعادہ کیا کہ پوری قوم اپنی افواج کے شانہ بشانہ کھڑی ہے۔
یاد رہے کہ ایک سال قبل کامیابی سے مکمل ہونے والا "آپریشن بنیان مرصوص” ملکی سالمیت کے تحفظ میں سنگِ میل ثابت ہوا تھا۔ تقریب کے مقررین نے اس آپریشن کی تزویراتی کامیابیوں پر روشنی ڈالتے ہوئے کہا کہ پاک فوج نے ثابت کیا ہے کہ وہ ہر قسم کی اندرونی و بیرونی سازشوں کے سامنے "سیسہ پلائی ہوئی دیوار” کی مانند کھڑی ہے۔
اختتامی تقریب
تقریب کے آخر میں شہداء کے درجات کی بلندی اور ملک کی سلامتی کے لیے خصوصی دعا کی گئی۔ بارڈر پر موجود شہریوں نے جوانوں کے ساتھ تصاویر بنوائیں اور ان کے بلند حوصلے کو خراجِ تحسین پیش کیا۔
