اسلام آباد: خطے کی بدلتی ہوئی جیو پولیٹیکل صورتحال کے درمیان، وفاقی وزیر داخلہ محسن نقوی ایک اہم سفارتی اور سیکیورٹی مشن پر ایران روانہ ہو گئے ہیں۔ اس دورے کو پاک ایران تعلقات اور سرحدی استحکام کے حوالے سے انتہائی کلیدی پیش رفت قرار دیا جا رہا ہے۔
ذرائع کے مطابق وزیر داخلہ کے اس اہم دورے کے دوران فیلڈ مارشل سید عاصم منیر کا خصوصی پیغام ایرانی حکام کو پہنچایا جائے گا، جس کا مقصد دونوں ممالک کے مابین سیکیورٹی تعاون کو مزید مضبوط بنانا ہے۔ دوسری جانب، وزیراعظم شہباز شریف نے بھی دورے سے قبل وزیر داخلہ کو تہران میں ہونے والی بات چیت کے ایجنڈے اور مذاکرات کے خدوخال پر خصوصی ہدایات جاری کر دی ہیں۔
اپنے قیام کے دوران وزیر داخلہ محسن نقوی ایرانی سکیورٹی قیادت اور حکومتی عہدیداروں سے ملاقاتیں کریں گے، جس میں انسدادِ دہشت گردی، بارڈر سیکیورٹی اور دوطرفہ اسٹریٹجک امور پر تفصیلی مشاورت کی جائے گی۔
