لاہور: پاکستان ویمنز کرکٹ ٹیم کے ہیڈ کوچ محمد وسیم اور کھلاڑیوں نے ایشیا کپ کے فائنل میں شرکت کرنے والی مردوں کی قومی ٹیم کے لیے اپنی مکمل سپورٹ اور نیک خواہشات کا اظہار کیا ہے۔
ہیڈ کوچ محمد وسیم نے کہا کہ پاکستان اور بھارت کا مقابلہ نہایت اہم اور سخت ہوگا، ہماری دعائیں اور سپورٹ پوری ٹیم کے ساتھ ہیں۔ انہوں نے امید ظاہر کی کہ پاکستان جیت کر ملک کا نام روشن کرے گا۔
ویمن کرکٹر سدرہ امین نے کہا کہ یہ دن پاکستان کے لیے بہت خاص ہے، اور ہم دل کی گہرائیوں سے پوری ٹیم کی حمایت کرتے ہیں۔ انہوں نے دعا کی کہ ٹیم بہادری سے کھیلے اور اللہ ان کا حامی و ناصر ہو۔ سدرہ نے کہا، "ہماری خواہش ہے کہ آپ ایشیا کپ جیت کر واپس آئیں، گڈ لک!”
عالیہ ریاض نے بھی مردوں کی ٹیم کے لیے نیک خواہشات کا اظہار کرتے ہوئے کہا، "سب کی دعائیں آپ کے ساتھ ہیں، بیسٹ آف لک، جم کر کھیلیں اور ملک کا نام روشن کریں۔”
اسی طرح اومیمہ سہیل، نتالیہ پرویز، شوال ذوالفقار اور سیدہ عروب شاہ نے بھی ٹیم کے لیے نیک خواہشات دیں اور کہا کہ پوری قوم کی دعائیں پاکستان ٹیم کے ساتھ ہیں، انشاء اللہ وہ یہ میچ جیتیں گے۔
