لاہور: پنجاب میں دریاؤں کی موجودہ صورتحال کے مطابق پانی کا بہاؤ نارمل ہے اور سیلاب سے متاثرہ علاقوں میں پانی کی سطح میں بتدریج کمی ہو رہی ہے۔ متعلقہ ادارے بحالی کے لیے مؤثر اقدامات کر رہے ہیں تاکہ نقصان کو کم سے کم کیا جا سکے۔
دریائے ستلج میں گنڈا سنگھ والا پر پانی کا بہاؤ 95 ہزار کیوسک اور سلیمانکی پر 81 ہزار کیوسک ریکارڈ کیا گیا ہے جہاں درمیانے سے نچلے درجے کی سیلابی صورتحال برقرار ہے۔ دریائے چناب میں مرالہ کے مقام پر پانی کا بہاؤ 55 ہزار کیوسک، خانکی ہیڈ ورکس پر 24 ہزار کیوسک، قادر آباد پر 29 ہزار کیوسک، ہیڈ تریموں پر 35 ہزار کیوسک اور پنجند پر ایک لاکھ 18 ہزار کیوسک ہے۔
اسی طرح دریائے راوی میں جسڑ کے مقام پر 6 ہزار کیوسک، شاہدرہ پر 9 ہزار کیوسک، بلوکی ہیڈ ورکس پر 28 ہزار کیوسک اور ہیڈ سدھنائی پر 30 ہزار کیوسک پانی کا بہاؤ جاری ہے۔ ڈیرہ غازی خان ڈویژن کی رود کوئیوں میں فی الحال پانی کا بہاؤ موجود نہیں ہے۔
محکمہ موسمیات اور آبی وسائل کے حکام نے بتایا کہ موسمی حالات میں بہتری کے ساتھ سیلاب کی صورتحال قابو میں ہے اور بحالی کے کاموں کو تیز کیا جا رہا ہے تاکہ متاثرہ علاقوں میں معمول کی زندگی جلد بحال ہو سکے۔
