کیلیفورنیا: سوشل میڈیا پلیٹ فارم انسٹاگرام نے اپنے پلیٹ فارم پر کم عمر صارفین کی حفاظت کے لیے نئے اور سخت قوانین متعارف کرانے کا اعلان کیا ہے۔ کمپنی کا کہنا ہے کہ یہ اقدامات 18 سال سے کم عمر کے صارفین کو نامناسب مواد سے بچانے کے لیے کیے جا رہے ہیں۔
یہ تبدیلیاں ایک سال قبل متعارف کرائے گئے "ٹین اکاؤنٹس” کے تحت کی گئی ہیں، جن پر اب مزید پابندیاں عائد کی گئی ہیں۔ نئے قوانین کے مطابق، 18 سال سے کم عمر کے صارفین اب وہ اکاؤنٹس فالو یا دیکھ نہیں سکیں گے جو اکثر نامناسب یا غیر موزوں مواد شیئر کرتے ہیں۔ اس کے علاوہ، ایسے اکاؤنٹس کو کم عمر صارفین کی ریکومینڈیشنز اور سرچ رزلٹس میں نظر آنے سے روک دیا جائے گا۔
انسٹاگرام نے یہ بھی اعلان کیا کہ کم عمر صارفین کو کچھ مخصوص سرچ اصطلاحات، جیسے الکحل کے استعمال سے متعلق مواد، دیکھنے سے روکا جائے گا۔ یہ اقدامات اس بات کو یقینی بنانے کے لیے کیے گئے ہیں کہ بچوں اور نوجوانوں کو صرف موزوں اور محفوظ مواد تک رسائی حاصل ہو۔
اس کے علاوہ، میٹا نے ایک نیا فیچر متعارف کرایا ہے جس کے ذریعے والدین اپنے بچوں کے اکاؤنٹس پر کنٹرول حاصل کر سکیں گے۔ اس فیچر کے ذریعے والدین اپنے بچوں کے کمنٹس اور پوسٹس کی نگرانی کر سکیں گے اور اگر کوئی پوسٹ نامناسب ہو تو اسے رپورٹ کر سکیں گے۔
یہ تبدیلیاں بتدریج متعارف کرائی جائیں گی اور سب سے پہلے امریکا، برطانیہ، کینیڈا اور آسٹریلیا میں لاگو کی جائیں گی۔
انسٹاگرام کا کہنا ہے کہ یہ اقدامات کم عمر صارفین کی حفاظت اور ان کے آن لائن تجربے کو محفوظ بنانے کے لیے کیے جا رہے ہیں، تاکہ سوشل میڈیا پر بچوں اور نوجوانوں کی بڑھتی ہوئی موجودگی کے ساتھ انہیں ایک محفوظ ماحول فراہم کیا جا سکے۔
