کیلیفورنیا: بلو سکائی، ایک ڈی سینٹرلائزڈ مائیکرو بلاگنگ پلیٹ فارم، نے اپنی پلیٹ فارم کی فیڈ میں صارفین کی پسند ناپسند کے مطابق مواد کی شناخت کے لیے نیا "ڈس لائک” فیچر متعارف کرانے کا اعلان کیا ہے۔ کمپنی کے مطابق، یہ فیچر صارفین کو اپنی فیڈ میں وہ مواد نظر آنے سے بچانے میں مدد دے گا جس میں ان کی دلچسپی نہیں، اور اس سے الگورتھم بھی صارفین کی ترجیحات کو بہتر طور پر سمجھ سکے گا۔
بلو سکائی نے وضاحت کی کہ "ڈس لائک” فیچر کا مقصد منفی رویوں کو فروغ دینا نہیں، بلکہ اس کا استعمال فیڈ کی شخصی نوعیت کو بڑھانے اور اسے مزید دلچسپ بنانے کے لیے کیا جائے گا۔ اس فیچر کی مدد سے صارفین آسانی سے وہ مواد نشان زد کر سکیں گے جسے وہ دوبارہ دیکھنا نہیں چاہتے، اور اس سے پلیٹ فارم کی انٹرایکشن کا معیار بہتر ہو سکے گا۔
کمپنی نے مزید بتایا کہ اس کے علاوہ کئی نئے فیچرز بھی متعارف کرائے جا رہے ہیں جن میں سوشل نیبرہڈز (سماجی حلقے)، ڈیزائن اپ ڈیٹس اور ریپلائی سسٹم میں بہتری شامل ہے۔ ان تبدیلیوں کا مقصد اسپیم، منفی تبصروں اور غیر متعلقہ مواد کو کم کرنا ہے تاکہ پلیٹ فارم کو ایک محفوظ اور متوازن سوشل نیٹ ورک بنایا جا سکے۔
بلو سکائی کا کہنا ہے کہ ان فیچرز کی مدد سے بات چیت کا ماحول زیادہ دلچسپ، حقیقی اور بااحترام بنے گا، اور صارفین کو بہتر تجربہ فراہم کرنے میں مدد ملے گی۔ کمپنی کا دعویٰ ہے کہ ان تبدیلیوں سے پلیٹ فارم کا معیار بلند ہوگا اور صارفین کے لیے زیادہ مناسب مواد کی پیشکش ممکن ہو سکے گی۔
بلو سکائی کی صارفین کی تعداد اب 4 کروڑ سے تجاوز کر چکی ہے، اور کمپنی نے اس نئے فیچر کے ذریعے سوشل میڈیا کی دنیا میں ایک نیا معیار قائم کرنے کی کوشش کی ہے۔ اس فیچر کا مقصد صارفین کو زیادہ اختیار دینا ہے تاکہ وہ اپنے تجربے کو اپنی پسند کے مطابق ڈھال سکیں۔
