اسلام آباد :وزیر دفاع خواجہ آصف نے کہا ہے کہ ہر شہری کو احتجاج اور رائے کا اظہار کرنے کا حق حاصل ہے، تاہم پاکستان کی سرزمین، فوج اور قومی وقار کے خلاف بیانات کسی بھی صورت میں قابل قبول نہیں۔
خواجہ آصف نے پی ٹی آئی کے بانی کے حالیہ بیانات کی جانب اشارہ کرتے ہوئے کہا کہ فوج اور اس کے سربراہ کے خلاف سخت زبان استعمال کرنے والے بیانات پر مناسب جواب دیا جائے گا۔ انہوں نے زور دیا کہ احتجاج کے دوران بھی پاکستان کی اہمیت اور غیرت کا احترام ضروری ہے۔
وزیر دفاع نے مزید کہا کہ بانی پی ٹی آئی کی بہنوں کا بھارتی میڈیا پر تنقید کرنا ملک کے مفاد میں نہیں اور ایسا رویہ پاکستان کی اقدار کے خلاف ہے۔ انہوں نے یاد دلایا کہ ماضی میں بھی فوج پر تنقید کی گئی مگر کبھی سرخ لکیر عبور نہیں کی گئی۔
