ماسکو:روس کے صدر ولادیمیر پیوٹن نے یوکرین کے ساتھ جاری طویل تنازع کے حوالے سے ایک اہم اور فیصلہ کن بیان دیتے ہوئے کہا ہے کہ یہ جنگ اب اپنے اختتام کی جانب بڑھ رہی ہے۔ ماسکو میں گفتگو کرتے ہوئے صدر پیوٹن نے واضح کیا کہ ان کے خیال میں یوکرین بحران اب منطقی انجام کے قریب پہنچ چکا ہے۔
روسی صدر نے مذاکراتی عمل میں امریکی کردار کی تعریف کرتے ہوئے کہا کہ وہ اس سہولت کاری پر امریکا کے شکر گزار ہیں، اور اب یہ معاملہ بنیادی طور پر روس اور یوکرین کے مابین ہی رہ گیا ہے۔ انہوں نے انکشاف کیا کہ یوکرینی صدر ولودیمیر زیلنسکی اب آمنے سامنے ملاقات کے لیے تیار ہیں، تاہم صدر پیوٹن نے اس ملاقات کو ایک دیرپا امن معاہدے کے طے پانے سے مشروط کر دیا ہے۔
علاقائی سیاست پر بات کرتے ہوئے روسی صدر نے ایران کے حوالے سے جاری کشیدگی کے جلد خاتمے کی امید ظاہر کی۔ ساتھ ہی انہوں نے روس اور چین کے درمیان توانائی کے شعبے میں ہونے والے ایک بڑے معاہدے کا ذکر کرتے ہوئے بتایا کہ دونوں ممالک تیل اور گیس کی فراہمی کے تاریخی معاہدے کے انتہائی قریب ہیں، جس سے مستقبل میں دوطرفہ معاشی تعلقات مزید مستحکم ہوں گے۔
