لاہور :لاہور میں سپیریئر یونیورسٹی کے زیر اہتمام ایسوسی ایشن آف پرائیویٹ سیکٹر یونیورسٹیز آف پاکستان (APSUP) کے تعاون سے ایک اہم سیمینار کا انعقاد کیا گیا، جس کا موضوع تھا: "2030 کا پاکستان: چیلنجز، امکانات اور نئی راہیں”۔
تقریب کا آغاز APSUP کے چیئرمین پروفیسر ڈاکٹر چوہدری عبد الرحمان نے کیا، جنہوں نے تعلیمی میدان میں نجی شعبے کے کردار پر روشنی ڈالی۔ ان کا کہنا تھا کہ ملک کی ترقی میں ہائر ایجوکیشن اور خاص طور پر پرائیویٹ یونیورسٹیوں کی شراکت بہت اہم ہے۔
سیمینار کے مہمانِ خصوصی، چیئرمین پنجاب گروپ آف کالجز میاں عامر محمود نے تقریب سے خطاب کرتے ہوئے کہا کہ نئے صوبوں کا قیام وقت کی اہم ضرورت بن چکا ہے۔ انہوں نے پروفیسر ڈاکٹر چوہدری عبد الرحمان کی اس موضوع پر قیادت اور کاوشوں کو سراہا۔
میاں عامر محمود نے کہا کہ دنیا بھر میں وفاقی نظام کے تحت کئی ریاستیں اور صوبے کام کر رہے ہیں، جیسے امریکہ میں 50 ریاستیں ہیں، جبکہ پاکستان میں صرف چار صوبے ہیں۔ ان کا کہنا تھا کہ اگر پاکستان کے 33 ڈویژنز کو صوبوں میں بدلا جائے تو حکومتی کارکردگی بہتر اور عوام کے مسائل جلد حل کیے جا سکتے ہیں۔
انہوں نے کہا کہ چھوٹے صوبے نہ صرف کرپشن کے امکانات کو کم کرتے ہیں بلکہ عوامی سہولیات کی مؤثر فراہمی کو بھی ممکن بناتے ہیں۔ انہوں نے APSUP کے پلیٹ فارم سے اس سلسلے میں ایک تفصیلی خاکہ بھی پیش کیا۔
میاں عامر محمود نے زور دیا کہ بہترین گورننس اور مؤثر لیڈرشپ ہی پاکستان کی ترقی کی کنجی ہیں۔ ان کا کہنا تھا کہ جب تک نظامِ حکومت میں بہتری نہیں آئے گی، عام آدمی کے مسائل حل نہیں ہو سکتے۔
انہوں نے مزید کہا کہ ریاست کی اصل ذمہ داری شہریوں کو بنیادی سہولیات فراہم کرنا ہے۔ انہوں نے کہا کہ حکومتیں صرف نیتوں سے نہیں، مؤثر پالیسیوں سے چلتی ہیں۔
سیمینار میں طلباء و طالبات نے بھی بھرپور شرکت کی اور سوالات کے ذریعے موضوع پر گہری دلچسپی کا اظہار کیا۔
تقریب کے اختتام پر پروفیسر ڈاکٹر چوہدری عبد الرحمان نے میاں عامر محمود کا شکریہ ادا کرتے ہوئے انہیں یادگاری سووینئر پیش کیا۔
یہ سیمینار تعلیمی، سماجی اور سیاسی شعور بیدار کرنے کی ایک مؤثر کوشش کے طور پر سراہا جا رہا ہے، جو نوجوانوں کو ملک کے مستقبل کے حوالے سے سوچنے اور کردار ادا کرنے کی ترغیب دیتا ہے۔
