تہران:مشرقِ وسطیٰ کی تیزی سے بدلتی صورتحال کے درمیان یورپی یونین نے ایران کے خلاف سخت ترین موقف اپناتے ہوئے ‘ایرانی پاسدارانِ انقلاب’ (IRGC) کو باضابطہ طور پر دہشت گرد تنظیموں کی فہرست میں شامل کر لیا ہے۔ یہ فورس، جو ایران کے دفاعی اور معاشی ڈھانچے میں ریڑھ کی ہڈی کی حیثیت رکھتی ہے، براہِ راست سپریم لیڈر آیت اللہ علی خامنہ ای کے احکامات پر عمل پیرا ہوتی ہے۔
ایران نے اس اقدام کو اشتعال انگیزی قرار دیتے ہوئے شدید احتجاج کیا ہے۔ ایرانی وزیر خارجہ عباس عراقچی نے عالمی برادری کو خبردار کیا کہ یورپ کا یہ فیصلہ خطے کے استحکام کے لیے ایک بڑی اسٹریٹجک غلطی ثابت ہوگا۔ ایران اس اقدام کو یورپی خود مختاری کے بجائے امریکا اور اسرائیل کی اندھی پیروی قرار دیتا ہے۔
انہوں نے یورپی ممالک کو مشورہ دیا کہ وہ اپنا "دوغلا پن” ترک کریں اور حقائق کو تسلیم کریں۔تجزیہ کاروں کے مطابق پاسدارانِ انقلاب کو دہشت گرد قرار دینے سے نہ صرف ایران اور یورپ کے درمیان سفارتی تعلقات منقطع ہو سکتے ہیں بلکہ تنظیم سے وابستہ کمپنیوں اور بینکوں پر عالمی پابندیاں مزید سخت ہو جائیں گی۔ جوہری معاہدہ: ایران کے جوہری پروگرام سے متعلق مذاکرات مکمل طور پر ختم ہونے کا خدشہ ہے۔
مشرقِ وسطیٰ میں موجود یورپی مفادات اور بحری تجارتی راستوں پر کشیدگی بڑھ سکتی ہے۔ایرانی وزیر خارجہ کا دو ٹوک پیغام ہے کہ اگر یورپ نے اپنی پالیسیوں پر نظرثانی نہ کی تو اسے اس کے سنگین نتائج بھگتنا ہوں گے۔
