ایران کا اسرائیل پر بڑا میزائل حملہ: تل ابیب دھماکوں سے لرز اٹھا، امریکی فوجی تنصیبات بھی نشانے پر

تہران/تل ابیب :مشرقِ وسطیٰ میں جنگ کے شعلے مزید بھڑک اٹھے ہیں کیونکہ ایران نے اسرائیل اور خطے میں امریکی مفادات پر اپنے حملوں میں شدید اضافہ کر دیا ہے۔ حالیہ میزائل حملوں نے اسرائیل کے دفاعی نظام کو بڑا چیلنج دے دیا ہے، جس کے نتیجے میں کئی شہروں میں بھاری تباہی کی اطلاعات ہیں۔
میڈیا رپورٹس کے مطابق تل ابیب میں یکے بعد دیگرے 20 دھماکے سنے گئے ہیں۔ شہر کے مختلف حصوں میں میزائل گرنے سے ہولناک آگ لگ گئی ہے اور کئی مقامات پر انفراسٹرکچر ملبے کا ڈھیر بن چکا ہے۔اسرائیل کے وسطی علاقوں میں میزائلوں کا ملبہ گرنے سے عام شہریوں کی املاک کو شدید نقصان پہنچا ہے، جبکہ سکیورٹی ادارے نقصانات کا تخمینہ لگا رہے ہیں۔
ایران کے پاسدارانِ انقلاب نے اعلان کیا ہے کہ انہوں نے خلیجی ممالک میں موجود امریکی فوجی اڈوں کو نشانہ بنانے کی نئی لہر شروع کر دی ہے۔ اس کارروائی کے دوران 6 امریکی ڈرونز کو مار گرانے کا بھی دعویٰ کیا گیا ہے، جو خطے میں امریکی فضائی بالادستی کے لیے ایک بڑا دھچکا ثابت ہو سکتا ہے۔
جنگ کی یہ آگ پڑوسی ممالک تک بھی پھیلتی دکھائی دے رہی ہے۔ کویت نیشنل گارڈ نے دعویٰ کیا ہے کہ انہوں نے اپنی اہم تنصیبات کی جانب بڑھتے ہوئے ایک مشکوک ڈرون کو فضا میں ہی تباہ کر دیا۔ اس واقعے کے بعد کویت سمیت دیگر خلیجی ریاستوں نے اپنی دفاعی تیاریوں کو انتہائی سطح پر پہنچا دیا ہے۔
عالمی برادری نے اس تازہ کشیدگی پر شدید تشویش کا اظہار کیا ہے۔ ماہرین کا کہنا ہے کہ اگر ایران اور امریکہ کے درمیان براہِ راست ٹکراؤ شروع ہوا تو یہ عالمی توانائی کی سپلائی اور معیشت کے لیے تباہ کن ثابت ہوگا۔