کراچی میں عید کی صبح گرج چمک اور آندھی کے ساتھ موسلا دھار بارش، کئی مقامات پر نمازِ عید کے اجتماعات متاثر

کراچی : شہرِ قائد میں عید الفطر کا استقبال ابرِ رحمت نے کیا، تاہم تیز ہواؤں اور گرج چمک کے ساتھ ہونے والی موسلا دھار بارش نے کھلے مقامات پر نمازِ عید کے انتظامات کو درہم برہم کر دیا۔ مغربی ہواؤں کے سلسلے کے باعث شہر کا موسم تو خوشگوار ہو گیا لیکن شہریوں کو آمد و رفت میں شدید مشکلات کا سامنا ہے۔
آج علی الصبح کراچی کے تقریباً تمام علاقوں بشمول گلشنِ اقبال، کلفٹن، ڈی ای اے، لیاقت آباد، نارتھ کراچی اور اسکیم 33 میں بادل گرج چمک کے ساتھ برسے۔ گرومندر، لسبیلہ اور شاہراہِ فیصل پر تیز ہواؤں کے ساتھ ہونے والی بارش نے عید کی صبح کا نقشہ بدل دیا۔ محکمہ موسمیات کے مطابق یہ اسپیل وقفے وقفے سے جاری رہنے کا امکان ہے۔
تیز بارش کے باعث پارکوں اور کھلے میدانوں میں ہونے والے عید کے اجتماعات شدید متاثر ہوئے۔ کئی بڑی عید گاہوں میں پانی جمع ہونے کی وجہ سے نمازِ عید کے اجتماعات مساجد کے اندر منتقل کر دیے گئے، جبکہ انتظامیہ کو ہنگامی بنیادوں پر صفائی کے انتظامات کرنے پڑے۔ بارش کے باعث کئی مقامات پر نماز کے اوقات میں بھی رد و بدل کیا گیا۔
اچانک بارش کے نتیجے میں نشیبی علاقوں اور اہم شاہراہوں پر پانی جمع ہونا شروع ہو گیا ہے، جس سے عید کی نماز کے لیے نکلنے والے شہریوں کو دشواری کا سامنا ہے۔ بلدیاتی عملے کو سڑکوں سے نکاسیِ آب کے لیے ہائی الرٹ کر دیا گیا ہے جبکہ شہریوں کو بجلی کے تاروں اور کھمبوں سے دور رہنے کی تاکید کی گئی ہے تاکہ کسی بھی ناخوشگوار واقعے سے بچا جا سکے۔