اسلام آباد / لاہور (نیوز ڈیسک)
ملک بھر میں آج یومِ پاکستان ملی جوش و جذبے اور قومی یکجہتی کے ساتھ منایا جا رہا ہے۔ دن کا آغاز وفاقی دارالحکومت میں 31 جبکہ چاروں صوبائی دارالحکومتوں میں 21، 21 توپوں کی سلامی سے ہوا۔ اس موقع پر پاک فوج کے جوانوں نے "اللہ اکبر” اور "پاکستان زندہ باد” کے فلک شگاف نعرے لگائے، جبکہ مساجد میں خصوصی دعائیں کی گئیں۔
کفایت شعاری اور حکومتی اقدامات
حکومت کی جانب سے جاری کردہ کفایت شعاری اقدامات کے تحت اس سال یومِ پاکستان کی روایتی بڑی فوجی پریڈ اور دیگر مہنگی تقریبات منعقد نہیں کی گئیں۔ اس فیصلے کا مقصد قومی وسائل کو بچانا اور سادگی کو فروغ دینا ہے۔ دوسری جانب، وفاقی وزیر خزانہ نے قوم کو یقین دہانی کرائی ہے کہ ملک بھر میں پیٹرول، ڈیزل اور ایل پی جی کی بلا تعطل فراہمی کے لیے تمام ضروری اقدامات مکمل کر لیے گئے ہیں۔
مزارِ اقبال پر پروقار تقریب
لاہور میں مصورِ پاکستان علامہ محمد اقبال کے مزار پر گارڈز کی تبدیلی کی ایک باوقار تقریب منعقد ہوئی۔ پاک فضائیہ اور ستلج رینجرز کے چاق و چوبند دستوں نے مارچ پاسٹ کیا اور مزار کی حفاظت کے فرائض سنبھالے۔
تقریب کے مہمانِ خصوصی ایئر وائس مارشل محمد شاہد افضل تھے۔ انہوں نے مزارِ اقبال پر پھولوں کی چادر چڑھائی، فاتحہ خوانی کی اور مہمانوں کی کتاب میں اپنے تاثرات درج کرتے ہوئے حکیم الامت کے افکار کو قوم کے لیے مشعلِ راہ قرار دیا۔
