اسلام آباد :وفاق کی دو بڑی حکمران جماعتوں، پاکستان مسلم لیگ (ن) اور پاکستان پیپلز پارٹی نے آزاد جموں و کشمیر اور گلگت بلتستان کے آئندہ انتخابات کے لیے ایک مشترکہ سیاسی بلاک بنانے کا فیصلہ کر لیا ہے۔ وزیراعظم شہباز شریف اور بلاول بھٹو زرداری کی حالیہ ملاقات میں طے پانے والے اہم نکات کی تفصیلات سامنے آ گئی ہیں۔
دونوں جماعتیں آزاد کشمیر اور گلگت بلتستان میں انتخابات مل کر لڑیں گی۔ سیٹ ایڈجسٹمنٹ کے ذریعے ایک دوسرے کے ووٹ بینک کو سہارا دیا جائے گا۔ انتخابات کے بعد کسی بھی جماعت کی واضح اکثریت نہ ہونے کی صورت میں، دونوں پارٹیاں مل کر اتحادی حکومتیں بنائیں گی۔
وفاق کی طرح ان خطوں میں بھی شراکتِ اقتدار (Power Sharing) کا وہی ماڈل اپنایا جائے گا جو اس وقت اسلام آباد میں کامیابی سے چل رہا ہے۔ذرائع کا کہنا ہے کہ اس بڑے فیصلے کے پیچھے چند تزویراتی وجوہات کارفرما ہیں۔ سیاسی پنڈتوں کے مطابق، اس اتحاد کا مقصد یہ پیغام دینا ہے کہ وفاقی حکومت کے اتحادی تمام محاذوں پر ایک پیج پر ہیں۔
ملاقات میں اس بات پر اتفاق کیا گیا کہ اگر دونوں خطوں میں مرکزی حکومت کی اتحادی جماعتیں ہوں گی، تو ترقیاتی فنڈز کی فراہمی اور سی پیک (CPEC) سے جڑے منصوبوں میں تیزی آئے گی۔ اس اتحاد کے ذریعے اپوزیشن کو ان کے روایتی گڑھوں میں سخت ٹف ٹائم دینے کی تیاری کی گئی ہے۔
وزیراعظم شہباز شریف اور بلاول بھٹو نے اتفاق کیا ہے کہ جلد ہی دونوں جماعتوں کے صوبائی اور علاقائی صدور پر مشتمل ایک کمیٹی تشکیل دی جائے گی جو حلقہ وار امیدواروں کا جائزہ لے کر حتمی رپورٹ پیش کرے گی۔
