میرپورخاص: سندھ حکومت کی جانب سے خواتین کو سفری سہولت فراہم کرنے اور انہیں بااختیار بنانے کے لیے مفت پنک سکوٹیز کی فراہمی کا سلسلہ جاری ہے، سینئر وزیر شرجیل انعام میمن نے میرپورخاص میں خواتین میں سکوٹیز تقسیم کیں۔
تقریب سے خطاب کرتے ہوئے شرجیل میمن نے کہا کہ خواتین کو مفت پنک سکوٹیز فراہم کرنے کا پروگرام جاری رہے گا اور سکوٹیز کی فراہمی کا سلسلہ رکنے والا نہیں۔
انہوں نے کہا کہ خواتین کو بااختیار بنانا سندھ حکومت کی ترجیحات میں شامل ہے، جبکہ پیپلز پارٹی خواتین کی معاشی اور سماجی خودمختاری کے لیے اقدامات جاری رکھے گی۔
سینئر وزیر نے کہا کہ سفری سہولت کی فراہمی سے خواتین کو تعلیم، روزگار اور دیگر سرگرمیوں تک رسائی میں آسانی ہوگی۔ حکومت خواتین کو اپنے پاؤں پر کھڑا ہونے کے لیے ضروری سہولیات فراہم کرنے کے لیے اقدامات کر رہی ہے۔
شرجیل میمن کے مطابق پنک سکوٹیز کی فراہمی کا مقصد خواتین کی نقل و حرکت کو آسان بنانا اور انہیں اپنی روزمرہ ضروریات کے لیے بہتر سفری سہولت فراہم کرنا ہے۔
انہوں نے کہا کہ سندھ کے مختلف علاقوں میں خواتین کو پنک سکوٹیز کی فراہمی کا عمل جاری رکھا جائے گا تاکہ زیادہ سے زیادہ خواتین اس پروگرام سے فائدہ اٹھا سکیں۔
