اسلام آباد: وزیراعظم شہباز شریف نے اپوزیشن کو مذاکرات کی مشروط پیشکش کرتے ہوئے کہا ہے کہ مارچ اور دھرنا ختم کیے جائیں، اس کے بعد حکومت بات چیت کے لیے تیار ہے۔ وزیراعظم نے خبردار کیا کہ دھرنے اور لانگ مارچ سے ملکی معیشت کو نقصان پہنچ سکتا ہے۔
کشمیر چوک کی افتتاحی تقریب سے خطاب کرتے ہوئے شہباز شریف نے کہا کہ ملکی ترقی کے پہیے کو جام کرنا ملک کے مفاد میں نہیں۔ دھرنے اور احتجاج سے ملک اور قوم کا نقصان ہوگا، جبکہ حکومت حالات کو خراب نہیں ہونے دے گی۔
وزیراعظم نے کہا کہ پاکستان تحریک انصاف کے ساتھ حکومت نے خلوص دل کے ساتھ مذاکرات کیے اور پوری امید تھی کہ بات چیت کامیاب ہوگی، تاہم ایسا نہ ہوسکا۔
شہباز شریف نے واضح کیا کہ قانون اپنا راستہ اختیار کرے گا اور دھرنے یا احتجاج کے باعث امن و امان کی صورتحال خراب نہیں ہونے دی جائے گی۔ انہوں نے اپوزیشن پر زور دیا کہ احتجاجی سرگرمیاں ختم کرکے مذاکرات کے ذریعے مسائل کے حل کی طرف بڑھا جائے۔
