کیلیفورنیا : واٹس ایپ نے اپنے چینلز کے لیے ایک دلچسپ اور مفید فیچر کی آزمائش شروع کر دی ہے جس کے ذریعے صارفین دوسرے افراد کو چینل فالو کرنے کی دعوت دے سکیں گے۔ اس نئے فیچر کا مقصد چینلز کی رسائی کو بڑھانا اور ان کے فالوورز کی تعداد میں اضافہ کرنا ہے۔
واٹس ایپ کی اپڈیٹس پر نظر رکھنے والی ویب سائٹس کے مطابق، اس فیچر کی ابتدائی آزمائش شروع ہو چکی ہے اور جلد ہی اس کا دائرہ وسیع کر دیا جائے گا۔ اس فیچر کے تحت، چینل کے ایڈمنز اپنے کانٹیکٹس میں شامل افراد کو چینل فالو کرنے کی دعوت بھیج سکیں گے۔ ایڈمنز چینل کی سیٹنگز میں جا کر اپنے فون میں موجود نمبرز کو منتخب کر کے دعوت بھیج سکتے ہیں۔
دعوت نامے کے ذریعے صارفین کو ایک میسیج موصول ہوگا، جس پر کلک کر کے وہ آسانی سے چینل کو فالو کر سکیں گے۔ اس فیچر سے چینل کے ایڈمنز کو اپنے چینل کے فالوورز کو بڑھانے میں مدد ملے گی، اور وہ اپنے مواد کو زیادہ سے زیادہ لوگوں تک پہنچا سکیں گے۔
یہ فیچر ابھی ابتدائی مرحلے میں ہے، لیکن واٹس ایپ کی جانب سے توقع کی جا رہی ہے کہ یہ جلد ہی مزید صارفین تک دستیاب ہو جائے گا۔ اس اقدام سے واٹس ایپ چینلز کی مقبولیت میں اضافہ ہونے کا امکان ہے، اور ایڈمنز کے لیے چینل کی ترقی کو مزید آسان بنایا جا سکے گا۔
