اسلام آباد :آئندہ مالی سال کے بجٹ کو معاشی چیلنجز کے مطابق ڈھالنے کے لیے حکومت اور پاکستان پیپلز پارٹی کے مابین مذاکرات نتیجہ خیز ثابت ہوئے ہیں اور دونوں جماعتوں میں بیشتر تجاویز پر وسیع اتفاقِ رائے ہو گیا ہے۔ معاشی ذرائع کا کہنا ہے کہ ملک کی موجودہ مالیاتی صورتحال اور درپیش چیلنجز کو سامنے رکھتے ہوئے دونوں جانب سے ایک دوسرے کے لیے سیاسی اور مالی گنجائش پیدا کرنے پر اصولی آمادگی ظاہر کی گئی ہے، جس کے بعد بجٹ کی باقاعدہ منظوری کا راستہ صاف ہو گیا ہے۔
ذرائع کے مطابق بجٹ کو مزید فول پروف اور قابلِ عمل بنانے کے لیے چند تکنیکی اور تزویراتی نکات پر تاحال کام جاری ہے، جس کے لیے دونوں جماعتوں کی مخصوص تیکنیکی کمیٹیاں تفصیلی جائزہ لے رہی ہیں تاکہ کسی بھی پیچیدگی سے بچا جا سکے۔
بجٹ امور پر ہونے والی اس اہم بیٹھک کے دوران سیاسی تال میل کا ایک خوشگوار پہلو اس وقت سامنے آیا جب وزیراعظم میاں شہباز شریف نے گلگت بلتستان کے حالیہ اسمبلی انتخابات میں پاکستان پیپلز پارٹی کی شاندار کامیابی پر صدر آصف علی زرداری کو دل کھول کر مبارکباد دی۔ ملاقات میں وزیراعظم نے چیئرمین پی پی پی بلاول بھٹو زرداری کی انتخابی مہم کو زبردست الفاظ میں سراہتے ہوئے کہا کہ بلاول بھٹو نے انتہائی فعال اور جاندار انداز میں مہم چلائی اور بہترین نتائج حاصل کیے۔ اس پر صدر آصف علی زرداری نے معنی خیز مسکراہٹ کے ساتھ برجستہ جواب دیا کہ "آخر وہ بیٹا میرا ہے۔
ذرائع کا کہنا ہے کہ یہ اعلیٰ سطح کی ملاقات انتہائی خوشگوار اور تندہی کے ماحول میں ہوئی، جس میں بجٹ کے معاشی اہداف حاصل کرنے اور ملک کی مجموعی سیاسی صورتحال پر مل کر آگے بڑھنے پر مکمل اتفاق کیا گیا۔
