عالمی سطح پر بھارت کے امیج کو دھچکا، امریکا میں منفی رائے غالب

واشنگٹن: بھارت کے عالمی تشخص سے متعلق پیو ریسرچ سینٹر کے سروے میں بھارتی مقبولیت میں کمی کا رجحان سامنے آیا ہے۔ پیو کے مطابق 36 ممالک میں بھارت کے بارے میں اوسطاً 45 فیصد افراد کی رائے مثبت جبکہ 41 فیصد کی رائے منفی ہے۔

رپورٹ کے مطابق تین سال قبل کیے گئے سروے میں بھارت کے حق میں مثبت اور منفی رائے کے درمیان فرق زیادہ تھا، تاہم حالیہ نتائج میں یہ فرق نمایاں طور پر کم ہوگیا ہے۔

امریکا سمیت بعض اہم ممالک میں بھارت کے بارے میں منفی تاثر میں اضافے کو بھارتی خارجہ پالیسی اور عالمی ساکھ کے لیے چیلنج قرار دیا جا رہا ہے۔ وال اسٹریٹ جرنل نے بھی بھارت کے عالمی امیج سے متعلق تجزیے میں ہندو قوم پرستی اور آن لائن سیاسی ماحول پر بحث کی ہے۔

پیو ریسرچ کے مطابق بھارت کے بارے میں عالمی رائے ملک بہ ملک مختلف ہے، اس لیے مجموعی نتائج کے ساتھ ہر ملک کے اعداد و شمار کو الگ تناظر میں دیکھنا ضروری ہے۔