اسلام آباد: نائب وزیراعظم و وزیر خارجہ اسحاق ڈار نے عالمی برادری پر زور دیا ہے کہ امن و خوشحالی کے قیام کے لیے تنازعات کو مذاکرات اور سفارتکاری کے ذریعے حل کیا جائے، عالمی قوانین کا امتیازی اور غیر منصفانہ اطلاق قابل قبول نہیں، اس سے عالمی سطح پر تفریق پیدا ہوتی ہے۔
مارگلہ ڈائیلاگ کی افتتاحی تقریب سے خطاب کرتے ہوئے اسحاق ڈار نے کہا کہ عالمی سکیورٹی انفراسٹرکچر اس وقت شدید دباؤ کا شکار ہے اور دنیا کو متعدد چیلنجز کا سامنا ہے۔ ان حالات میں ممالک کے درمیان تعاون اور کثیرالجہتی سفارتکاری کو فروغ دینا ضروری ہے۔
نائب وزیراعظم نے کہا کہ عالمی امن کو یقینی بنانے کے لیے تمام ممالک کو تنازعات کے حل میں مذاکرات کو ترجیح دینی چاہیے۔ مسائل کا پائیدار حل تصادم کے بجائے بات چیت اور سفارتی کوششوں سے ہی ممکن ہے۔
اسحاق ڈار کا کہنا تھا کہ بین الاقوامی قوانین کا اطلاق تمام ممالک پر یکساں ہونا چاہیے۔ اگر عالمی قوانین پر عمل درآمد میں امتیاز برتا جائے تو اس سے عالمی نظام میں عدم مساوات اور تفریق کو فروغ ملتا ہے۔
انہوں نے کہا کہ اقوام متحدہ اور دیگر عالمی اداروں کو موجودہ عالمی چیلنجز سے نمٹنے کے لیے اپنا کردار مزید مؤثر بنانا ہوگا۔ عالمی اداروں کی فعالیت اور مشترکہ کوششیں بین الاقوامی امن و استحکام کے لیے ناگزیر ہیں۔
نائب وزیراعظم نے مزید کہا کہ عالمی مسائل کا مقابلہ کرنے کے لیے باہمی تعاون، مشترکہ حکمت عملی اور کثیرالجہتی سفارتکاری کو آگے بڑھانا ہوگا تاکہ دنیا میں پائیدار امن اور خوشحالی کے اہداف حاصل کیے جا سکیں۔
