اسرائیل اور ایران کے درمیان جاری جنگ کے پیشِ نظر بین الاقوامی یہودی کھیلوں کا سب سے بڑا ایونٹ مکابیہ گیمز، جو جولائی 2025 میں یروشلم میں ہونا تھا، اب 2026 کے موسم گرما تک ملتوی کر دیا گیا ہے۔
منتظمین نے ایک بیان میں کہا ہے کہ یہ فیصلہ شرکاء کی حفاظت اور موجودہ صورتحال کے تناظر میں کیا گیا ہے۔ بیان میں مزید کہا گیا: "ہم آپ سے اگلے سال ملیں گے، پہلے سے زیادہ مضبوط اور متحد۔ یہ اب تک کے سب سے زیادہ معنی خیز مکابیہ گیمز ہوں گے۔”
تقریباً 10,000 ایتھلیٹس کی شرکت متوقع تھی جو دنیا بھر سے مختلف کھیلوں میں حصہ لینے کے لیے اسرائیل پہنچنے والے تھے۔ مکابیہ گیمز کو اکثر "یہودی اولمپکس” بھی کہا جاتا ہے اور یہ ہر چار سال بعد منعقد ہوتے ہیں۔ یاد رہے کہ 2021 کا ایونٹ بھی COVID-19 وبا کے باعث ایک سال تاخیر سے 2022 میں منعقد کیا گیا تھا۔
اس حالیہ التوا نے کھلاڑیوں، منتظمین اور شائقین میں مایوسی ضرور پیدا کی ہے، تاہم موجودہ سیکیورٹی صورتحال کو دیکھتے ہوئے اسے ایک ضروری فیصلہ قرار دیا جا رہا ہے۔
